حکومت بنگس کو ایک منفرد سیاحتی مقام کے طور پر ترقی دے گی:وزیر اعلیٰ

جموں//
وزیر اعلیٰ عمر عبداللہ کا کہنا ہے کہ حکومت بنگس کو ایک منفرد سیاحتی مقام کے طور پر ترقی دینے کا منصوبہ بنا رہی ہے اورسیاحوں کیلئے بنیادی سہولیات فراہم کرنے کیلئے فنڈز مختص کئے گئے ہیں۔
وزیر اعلیٰ‘جن کے پاس محکمہ سیاحت کا قلمدان بھی ہے‘ نے قانون ساز اسمبلی میں رُکن شیخ خورشید کے ایک سوال کا جواب دیتے ہوئے بتایا کہ بنگس ویلی کی ترقی کیلئے گزشتہ دو برسوں میں اِستعمال کئے گئے فنڈز کی تفصیلات کے مطابق موجودہ مالی سال۲۰۲۵۔۲۰۲۴ء کیلئے۳۰لاکھ روپے کی منظوری دی گئی ہے جن میں سے۲۴لاکھ روپے پہلے ہی جاری کئے جا چکے ہیں۔
وزیرا علیٰ نے جاری بجٹ سیشن کے وقفہ سوالات کے دوران جواب دیتے ہوئے کہا کہ بنگس ویلی کی پوری زمین محکمہ جنگلات کے دائرے میں آتی ہے ۔
اِس کے مطابق یہ معاملہ ضلع ترقیاتی کمشنر کپواڑہ کے سامنے اٹھایا گیا ہے تاکہ محکمہ جنگلات کی مشاورت سے مجوزہ کاموں کے لئے اراضی کی نشاندہی میں مداخلت کی جاسکے ۔
وزیرا علیٰ نے بتایا کہ محکمہ جنگلات کی جانب سے زمین کے پارسل کی نشاندہی کے بعد فارسٹ کلیئرنس کے لئے پرویش پورٹل پر ضروری اجازت اور این او سی طلب کئے جائیں گے ۔
عمرعبداللہ نے ماحولیاتی توازن کو برقرار رکھنے کے لئے کہا کہ محکمہ نے بڑی عمارتوں اور ہوٹلوں کی تعمیر سے گریز پر توجہ مرکوز کی ہے ۔
وزیرا علیٰ نے ایوان کو بتایا’’اس علاقے کو ایک ماحولیاتی سیاحتی مقام کے طور پر ترقی دینا مقصد ہوگا۔ محکمہ بنیادی تفریحی سہولیات، بارش سے بچاو کے لئے شیڈ، عوامی سہولیات، سائن بورڈوں، روشنی کے اِنتظام اورکوڑاکرکٹ کو ٹھکانے لگانے کی سہولیات کی تعمیر پر توجہ دے گا‘‘۔
اِس کے علاوہ وزیر اعلیٰ نے کہا کہ محکمہ سیاحت نے بنگس ویلی میں مقامی چرواہوں، خانہ بدوشوں اور بنگس وادی کے دیگر باشندوں کے روزگار کے تحفظ کیلئے پے انگ گیسٹ ہاوسز کی رجسٹریشن کا عمل شروع کیا ہے ۔
وزیر اعلیٰ نے کہا’’یہ اقدام مقامی ثقافت ، روایات ضیافتوں کے فروغ میں مدد گار ثابت ہوگا اور سیاحوں کیلئے ایک حقیقی تجربہ فراہم کرے گا‘‘۔انہوں نے ایوان کو بتایا کہ بنگس ویلی کے قریب۱۹گیسٹ ہاؤسز محکمہ سیاحت کے ساتھ رجسٹرڈ ہیں۔
عمرعبداللہ نے یہ بھی کہا کہ بنگس فیسٹول کا اِنعقاد کیا جائے گا تاکہ اِس خوبصورت مقام کی وسیع پیمانے پر تشہیر کی جا سکے ۔