میری حکومت لوگوں کی امنگوں کو پورا کرنے کےلئے پر عزم ہے :منوج سنہا

جموں/۳مارچ
جموں کشمیر کے لیفٹیننٹ گورنر منوج سنہا کا کہنا ہے کہ حکومت لوگوں کی امنگوں اور خواہشات کو پورا کرنے کے لئے پر عزم ہے ۔انہوں نے کہا کہ حالیہ برسوں کے دوران جموں و کشمیر کی معیشت میں قابل ذکر بڑھوتری ہوئی ہے ۔ان کا کہنا تھا کہ حکومت جموں و کشمیر کو ایک تعلیمی مرکز میں تبدیل کرنے پر توجہ مرکوز کر رہی ہے ۔
لیفٹیننٹ گورنر نے ان باتوں کا اظہار پیر کو اسمبلی کے پہلے بجٹ اجلاس سے خطاب کے دوران کیا۔
سنہا نے کہا”میری حکومت جموں وکشمیر کو ایک تعلیمی مرکز میں تبدیل کرنے کے لئے توجہ مرکوز کر رہی ہے “۔ان کا کہنا ہے کہ حکومت سکولوں کو بااختیار بنانے کےلئے اٹل ٹنکرنگ لیبارٹریز کے ساتھ اپ گریڈ کر رہی ہے ۔
ایل جی نے کہا کہ تدریسی مراکز کو بڑھانے اور اساتذہ کو بہتر بنانے کے لیے حکومت اساتذہ کے لیے صلاحیت سازی کے پروگراموں کو ترجیح دے رہی ہے تاکہ اسکولوں میں موثر سیکھنے کو یقینی بنایا جا سکے ۔انہوں نے کہا کہ تعلیمی اداروں میں بہتری لانے اور اساتذہ کی حاضری کو ٹریک کرنے کے لیے اقدامات کیے گئے ہیں۔
سنہا کا کہنا تھا”میری حکومت اعلیٰ تعلیم کے معیار کو بڑھانے کے لیے مناسب سہولیات کی فراہمی کو یقینی بناتے ہوئے کالجوں اور یونیورسٹیوں کے بنیادی ڈھانچے کو مضبوط بنانے کےلئے پرعزم ہے “۔
لیفٹیننٹ گورنر نے اپنے خطاب میں کہا کہ نیشنل ایجوکیشن پالیسی (این سی پی) 2020 کے مطابق ڈیجیٹل انفراسٹرکچر کو اعلیٰ تعلیمی اداروں میں طلباءاور فیکلٹی کی ریسرچ اینڈ ڈیولپمنٹ میں ترقی کے لیے رکھا جائے گا۔
ایل جی نے کہا”مزید برآں اختراعات، انکیوبیشنز اور کاروباری افراد کی فعال طور پر حوصلہ افزائی کی جائے گی تاکہ طلباءمیں اسٹارٹ اپس کی ثقافت کو فروغ دیا جا سکے اور انہیں ترقی اور خود انحصاری کو آگے بڑھانے کےلئے مہارتوں سے آراستہ کیا جا سکے “۔
سنہا نے کہا کہ کشمیر یونیورسٹی (کے یو) کی فیکلٹی کو عالمی سائنس دانوں میں سرفہرست دو فیصد میں تسلیم کیا جاتا ہے اورکلسٹر یونیورسٹی آف جموں اور آئی یو ایس ٹی جیسے ادارے اعلیٰ درجے کی تحقیق میں اپنا رول ادا رہے ہیں۔
ریاستی درجے کی بحالی کے بارے میں بات کرتے ہوئے منوج سنہا نے کہا کہ حکومت جموں وکشمیر کے ریاستی درجے کی بحالی کے مطالبے کو پورا کرنے کے لے پر عزم ہے ۔انہوں نے کہا کہ اس سلسلے میں تمام سٹیک ہولڈرز کے ساتھ بات چیت جاری رکھی جائے گی۔
سنہا کا کہنا تھا”حکومت جموں و کشمیر کو ریاست کا درجہ بحال کرنے کے لیے پرعزم ہے اور اس مقصد کو حاصل کرنے کے لیے تمام اسٹیک ہولڈرز کے ساتھ رابطے جاری رکھے جائیں گے “۔انہوں نے کہا کہ حکومت مرکز کے زیر انتظام علاقوں میں بروقت انتخابات کو یقینی بنا کر پنچایت اور شہری مقامی اداروں کو مضبوط کرنے کے لیے بھی پرعزم ہے ۔
لیفٹیننٹ گورنر نے کہا کہ حکومت کشمیری پنڈتوں کی واپسی کو آسان بنانے اور اس کے لیے ایک محفوظ اور سازگار ماحول پیدا کرنے کے لیے پرعزم ہے ۔انہوں نے کہا”حکومت لوگوں کی امنگوں اور خواہشات کو پورا کرنے کے کئے پر عزم ہے “۔
سنہا کا کہنا تھا کہ حالیہ برسوں کے دوران جموں و کشمیر کی معیشت میں قابل ذکر بڑھوتری ہوئی ہے ۔منوج سنہا نے کہا کہ خواتین کو با اختیار بنانا میری حکومت کی اولین ترجیح ہے ۔