رام بن میں قومی شاہراہ پر حادثہ، دو افراد جاں بحق

جموں//
جموں و کشمیر کے ضلع رام بن کے بانہال علاقے میں سرینگر،جموں قومی شاہراہ پر ہفتے کی صبح ایک کنٹینر ٹرک حادثے کا شکار ہوا جس کے نتیجے میں گاڑی کے ڈرائیور اور کنڈکٹر کی بر سر موقع ہی موت واقع ہوئی۔
ذرائع نے بتایا کہ بانہال میں ناچلانہ کے قریب قومی شاہراہ پر ایک کنٹینر ٹرک ڈرائیور کے قابو سے باہر ہو کر گہری کھائی میں جا گرا۔
انہوں نے کہا کہ حادثہ پیش آنے کے بعد بچائو ٹیمیں جائے موقع پر پہنچی اور گاڑی کے ڈرائیور اور کنڈکٹر کو نکال کر نزدیکی ہسپتال پہنچایا لیکن وہاں موجود ڈاکٹروں نے دونوں کو مردہ قرار دیا۔
ان کا کہنا ہے کہ متوفین کی شناخت معلوم کی جا رہی ہے ۔انہوں نے کہا کہ لاشوں کو طبی و قانونی لوازمات کی ادائیگی کیلئے سب ضلع ہسپتال بانہال منتقل کیا گیا ہے ۔
دریں اثنا پولیس نے اس ضمن میں ایک کیس درج کرکے کارروائیاں شروع کی ہیں۔