ریاستی درجے کی بحالی کا وعدہ ضرور پورا کیا جائیگا : مرکزی وزیراٹھوالے

جموں//
مرکزی وزیر برائے سوشل جسٹس رام داس اٹھوالے نے جمعرات کے روز کہاکہ دفعہ۳۷۰کی منسوخی کا فیصلہ ثمر آور ثابت ہوا ہے ۔
اٹھوالے نے کہاکہ ریاستی درجے کی بحالی کا وعدہ بھی ضرور پورا کیا جائے گا۔
ان باتوں کا اظہار موصوف وزیر نے جموں میں نامہ نگاروں سے بات چیت کے دوران کیا۔
اٹھوالے نے کہاکہ مودی جی کی سربراہی میں جموں وکشمیر میں امن و امان واپس لوٹ آیا ہے ۔
مرکزی وزیر مملکت کے مطابق جموں وکشمیر میں تعمیر وترقی کا جال بچھانے ، لوگوں کے مسائل حل کرنے کی خاطر موجودہ سرکار وعدہ بند ہے ۔ان کے مطابق حالیہ پارلیمانی اور اسمبلی انتخابات میں جموں وکشمیر میں ریکارڈ توڑ ووٹنگ ہوئی جس کے لئے مبارکبادی کے مستحق ہیں۔
اٹھوالے نے کہاکہ یہاں کے لوگوں نے نیشنل کانفرنس اور کانگریس کو اقتدار میں لایا تاہم سرکار جس کی بھی ہو موجودہ مرکزی حکومت لوگوں کے مسائل حل کرنے کی خاطر کوئی دقیقہ فروگزاشت نہیں کرئے گی۔
دفعہ ۳۷۰کے بارے میں رام داس اٹھوالے نے کہاکہ اس آرٹیکل کی منسوخی کے مثبت نتائج سامنے آئے ہیں۔
اٹھوالے نے مزید بتایا کہ جموں وکشمیر کے لوگ سٹیٹ ہڈ کی واپسی کی مانگ کر رہے ہیں اور میں یقین دلانا چاہتا ہوں کہ ان اس جائز مانگ کو بھی پورا کیا جائے گا۔
مرکزی وزیر نے کہا’’دفعہ۳۷۰کی منسوخی کی بل پیش کرنے کے دوران وزیر داخلہ امیت شاہ نے لوک سبھا میں ممبران کے سامنے وعدہ کیا تھا کہ ریاستی درجے کی بحالی کا فیصلہ موزون وقت پر لیا جائے گا۔‘‘