گٹیریس نے امن دیپ کو ٹیکنالوجی کے لیے سفیر مقرر کیا

اقوام متحدہ//
اقوام متحدہ کے سکریٹری جنرل انتونیو گٹیریس نے امن دیپ سنگھ گل کو ٹیکنالوجی کے لیے اپنا سفیر مقرر کیا ہے۔
مسٹر گل انٹرنیشنل ڈیجیٹل ہیلتھ اینڈ آرٹی فیشل انٹیلی جنس ریسرچ کولیبریٹو پروجیکٹ کے چیف ایگزیکٹو آفیسر (سی ای او) ہیں۔ وہ اس سے قبل جنیوا میں تخفیف اسلحہ کی کانفرنس (2016-2018) میں ہندوستان کے سفیر اور مستقل نمائندے کے طور پر خدمات انجام دے چکے ہیں۔مسٹر گٹیریس کے چیف ترجمان،ا سٹیفن دوجارک نے کہا ’’وہ (مسٹر گل) ڈیجیٹل ٹیکنالوجی کے نظریات والے لیڈر ہیں۔ انہیں ڈیجیٹل ٹیکنالوجی کا گہرا علم ہے‘‘۔
اس سے پہلے، مسٹر گِل ڈیجیٹل تعاون (2018-2019) پر اقوام متحدہ کے سیکرٹری جنرل کے اعلیٰ سطحی پینل کے ایگزیکٹو ڈائریکٹر اور شریک سربراہ کے طور پر خدمات انجام دے چکے ہیں۔ انہوں نے 1992 میں ہندوستان کی ڈپلومیٹک سروس میں شمولیت اختیار کی اور تہران اور کولمبو میں خدمات انجام دینے کے ساتھ ساتھ تخفیف اسلحہ اور اسٹریٹجک ٹیکنالوجیز اور بین الاقوامی سلامتی کے معاملات میں مختلف عہدوں پر خدمات انجام دیں۔
وہ اسٹینفورڈ یونیورسٹی میں وزیٹنگ اسکالر بھی ہیں۔
مسٹر گل نے کنگز کالج، لندن سے ملٹی لیٹرل فورمز میں نیوکلیئر ایجوکیشن میں پی ایچ ڈی، پنجاب یونیورسٹی چنڈی گڑھ سے بیچلر آف الیکٹرانکس اینڈ الیکٹریکل کمیونیکیشنز اور جنیوا یونیورسٹی سے فرانسیسی تاریخ اور زبانوں میں ڈپلومہ کیا ہے۔