ریزرویشن پالیسی پر تشکیل دی گئی کمیٹی پوری طرح سے ناکام :پی ڈی پی

سرینگر//
پیپلز ڈیموکریٹک پارٹی (پی ڈی پی)نے کہا ہے کہ نوجوانوں کے مستقبل کو بچانے کی خاطر ریزرویشن پالیسی کو کالعدم قرار دینا وقت کی اہم ضرورت ہے ۔
پی دی پی کی لیڈر‘التجا مفتی نے کہاکہ ریزرویشن معاملے پر سرکار نے جو کمیٹی تشکیل دی تھی وہ لوگوں کے توقعات پر کھرا اترنے میں ناکام ثابت ہو چکی ہے ۔
ان باتوں کا اظہار التجا مفتی نے سری نگر میں نامہ نگاروں سے بات چیت کے دوران کیا۔
التجا نے کہاکہ نیشنل کانفرنس نے الیکشن سے قبل جموں وکشمیر کے لوگوں سے وعدہ کیا تھا کہ ریزرویشن پالیسی کو منسوخ کیا جائے گا۔
پی ڈی پی لیڈر نے کہاکہ دو مہینے ہو گئے لیکن عمر عبداللہ کی سربراہی والی سرکار عوام سے کئے گئے وعدوں کو پورا کرنے میں ناکام ثابت ہوئی ہے ۔ان کا مزید کہنا تھا کہ ریزرویشن پالیسی پر عمر عبداللہ نے ایک سب کمیٹی تشکیل دی لیکن ایک ماہ گزر جانے کے بعد کمیٹی نے اپنی رپورٹ پیش نہیں کی ۔
التجا نے کہاکہ ریزرویشن پالیسی پر سبھی سیاسی پارٹیوں کو اب آگے آنا چاہئے کیونکہ یہ نوجوانوں کے مستقبل کے ساتھ جڑا ہوا ہے ۔ان کے مطابق پی ڈی پی نے ہمیشہ اتحاد و اتفاق کی بات کی اور محبوبہ مفتی نے گپکار الائنس کی تشکیل میں کلیدی کردار ادا کیا تھا ۔
پی ڈی پی لیڈر نے کہاکہ آج وزیر اعلیٰ کی رہائش گاہ کے باہر دھرنا غیر معمولی اہمیت کا حامل ہے ۔انہوں نے کہاکہ جموں وکشمیر کے نوجوان ریزرویشن پالیسی کا خاتمہ چاہتے ہیں لہذا سرکار کو بھی اس پر فوری طورپر اپنا فیصلہ سنانا چاہئے ۔
ادھرپی ڈی پی کے یوتھ لیڈر اور ممبر اسمبلی وحید الرحمن پرہ نے ریزرویشن پالیسی کو فوری طورپر واپس لینے کا مطالبہ کیا ہے ۔
پرہ نے کہاکہ نیشنل کانفرنس نے الیکشن سے قبل جو وعدہ کیا تھا اس کو اب پورا کرنا ناگزیر بن گیا ہے ۔
ان باتوں کا اظہار موصوف نے سری نگر میں نامہ نگاروں سے بات چیت کے دوران کیا۔
پی ڈی پی لیڈر نے کہاکہ آج نیشنل کانفرنس اور پی ڈی پی لیڈران نے نوجوانوں کے مستقبل کو بچانے کی خاطر مشترکہ طورپر احتجاج کیا۔
ان کے مطابق چونکہ ریزرویشن نوجوانوں کے مستقبل کے ساتھ جڑ ا ہوا ہے لہذا اس پر کوئی سیاست نہیں ہوگی بلکہ عوام کے جذبات و احساسات کو مد نظر رکھتے ہوئے آغا روح اللہ مہدی کے احتجاجی دھرنے میں شرکت کی۔
پرہ نے کہاکہ ریزرویشن پالیسی کے خلاف پی ڈی پی کا احتجاج جاری رہے گا کیونکہ یہ نوجوانوں کے مستقبل کے ساتھ جڑا ہوا ہے اس پر ہم چپ نہیں بیٹھیں گے ۔
ان کا مزید کہنا تھا کہ ممبر پارلیمنٹ آغا روح اللہ نے اس معاملے پر جو کچھ بھی کہا ہم اس کی تائید کرتے ہیں ۔’’ریزرویشن پالیسی اوپن میرٹ سے وابستہ نوجوانوں کے لئے ایک بہت بڑا ظلم ہے جس پر فوری طورپر نظر ثانی کی ضرورت ہے ‘‘۔
پرہ نے کہا’’جب بھی ا س معاملے پر آغا روح اللہ صاحب احتجاج کرنے کی کال دیں گے پی ڈی پی اس میں شامل ہوگی ۔‘‘