جموں خطے میں آپریشنل تیاریوں کو وسیع کیا ہے:جی او سی سچدیوا

راجوری//
فوج نے پیر پنجال رینج کے بالائی علاقوں پر اسٹریٹجک قبضہ سمیت جموں خطے میں اپنے آپریشنل نقش راہ میں اضافہ کیا ہے۔
فوج کے ایک سینئر افسر نے کہا کہ فوج خطے میں مستحکم ماحول پیدا کرنے میں فوجی اور سویلین کوآرڈینیشن میں اہم کردار ادا کر رہی ہے۔
افسر نے اس بات پر زور دیا کہ فوج اس خطے میں امن‘سلامتی اور ترقی کو فروغ دینے کیلئے اپنی کوششیں جاری رکھے گی۔
وائٹ نائٹ کور کے جنرل آفیسر کمانڈنگ (جی او سی) لیفٹیننٹ جنرل نوین سچدیوا نے کہا کہ یہ پیش رفت آپ کی غیر متزلزل حمایت کی بدولت ممکن ہوئی ہے۔انہوں نے کہا کہ حالیہ دنوں میں ہندوستانی فوج نے اپنی آپریشنل صلاحیتوں میں نمایاں اضافہ کیا ہے۔ ’’ہم نے بلند ترین پہاڑوں اور پہاڑیوں میں بھی اپنے گشت اور چوکیوں کو مضبوط کیا ہے‘‘۔
لیفٹیننٹ جنرل سچدیوا نے راجوری کا دورہ کیا تاکہ ’قومی ایکتا میٹنگ‘ میں حصہ لے کر سویلین ملٹری تعلقات کو مضبوط بنایا جاسکے جس کا مقصد خطے میں امن و استحکام برقرار رکھنے میں مقامی برادریوں اور سابق فوجیوں کے کردار کو تسلیم کرنا ہے۔
سچدیوا نے کہا کہ بالائی علاقوں میں نئی چوکیاں قائم کی گئی ہیں اور خطے میں امن و امان کو بہتر بنانے کیلئے رات کے وقت سیکیورٹی فورسز کی نقل و حرکت میں اضافہ کیا گیا ہے۔
فوجی کمانڈر نے کہا’’امن کو یقینی بنانے کیلئے ہیلی کاپٹر، یو اے وی اور کئی قسم کے سینسر ٹیکنالوجی کے حصے کے طور پر استعمال کیے جا رہے ہیں‘‘۔
دورے کے دوران لیفٹیننٹ جنرل سچدیوا نے خاص طور پر راجوری اور پونچھ کے حساس سرحدی اضلاع میں شہری آبادی اور سیکورٹی فورسز کے درمیان ہم آہنگی کی تعریف کی۔
سچدیوا نے فلاحی پروگراموں کے ذریعے اعتماد کو فروغ دینے اور مقامی برادریوں کو شامل کرنے میں اہم کردار ادا کرنے پر ایس آف سپیڈس ڈویڑن کی تعریف کی۔
کور کمانڈر نے مینڈھر کرکٹ پریمیئر لیگ (ایم سی پی ایل) کی اعزازی تقریب میں بھی شرکت کی۔ انہوں نے توانائی کو مثبت انداز میں چلانے اور کمیونٹی ہم آہنگی کو فروغ دینے میں اس طرح کی تقریبات کی اہمیت پر زور دیا۔