سنجیونی اسکیم کے تحت بزرگوں کا مفت علاج ہوگا: کیجریوال

نئی دہلی// عام آدمی پارٹی (اے اے پی) کے قومی کنوینر اروند کیجریوال نے کہا کہ جب ہماری پارٹی انتخابات کے بعد حکومت بنائے گی، ہم سنجیوانی یوجنا نافذ کریں گے اور دہلی میں 60 سال سے زیادہ عمر کے ہر بزرگ کا مفت علاج کریں گے ۔
مسٹر کیجریوال نے بدھ کو کہاکہ ”اگر ہماری حکومت بنتی ہے تو ساٹھ سال سے زیادہ عمر کے تمام بزرگوں کا مفت علاج کیا جائے گا۔ ہم بزرگوں کا بہت احترام کرتے ہیں۔ ان کی وجہ سے ہمارا وجود ہے ۔ آج ملک جہاں تک پہنچ گیا ہے اسے بزرگوں نے پہنچایا ہے ۔ بزرگوں نے 24 گھنٹے محنت کی، خون پسینہ بہایا، اپنے خاندان کی پرورش کی، معاشرے کو آگے بڑھایا اور ملک کو آگے لے گئے ۔ ان کے بچے ہونے کے ناطے ان کے بڑھاپے میں ان کا خیال رکھنا ہمارا فرض ہے ۔ ہم نے دہلی میں ‘وزیر اعلیٰ یاترا اسکیم’ کو نافذ کیا۔ اس اسکیم کے تحت اب تک ملک کے کونے کونے میں تقریباً ایک لاکھ بزرگ یاترا پر گئے ہیں۔
انہوں نے کہا کہ بڑھاپے میں ایک چیز سب کو پریشان کرتی ہے ۔ جیسے جیسے عمر بڑھتی ہے سو بیماریاں انسان کو گھیر لیتی ہیں۔ آدمی کی سب سے بڑی فکر یہ ہوتی ہے کہ اس کا علاج کیسے ہو گا۔ آج میں دہلی کے بزرگوں کے لیے ‘سنجیونی یوجنا’ کا اعلان کر رہا ہوں۔ 60 سال سے زائد عمر کے تمام بزرگوں کا مکمل علاج مفت کیا جائے گا۔ ہم اس سکیم کو انتخابات کے بعد پاس کریں گے ۔
اے اے پی کنوینر نے کہا کہ بزرگ چاہے سرکاری اسپتال میں علاج کرانا چاہتے ہوں یا پرائیویٹ اسپتال، ان کا مکمل علاج مفت کیا جائے گا۔ امیر ہو یا غریب، تمام بزرگوں کا مفت علاج کیا جائے گا۔ اس اسکیم میں کوئی بالائی حد نہیں ہوگی، بزرگوں کی بیماری پر جو بھی خرچ آئے گا وہ دہلی حکومت برداشت کرے گی۔ اس کے لیے رجسٹریشن دو سے تین دن میں شروع ہو جائے گی۔ بزرگوں کو رجسٹریشن کے لیے کہیں جانے کی ضرورت نہیں ہے ۔ عام آدمی پارٹی کے کارکنان گھر گھر جا کر ان کا اندراج کریں گے ۔
اے اے پی کے سینئر لیڈر منیش سسودیا نے سوشل میڈیا پر کہاکہ ”اگر آپ کا بیٹا ہے تو آپ کو اروند کیجریوال جیسا ہونا چاہیے ! پہلے ، شراون کمار کا روپ دھار کر انہوں نے لاکھوں بزرگوں کو یاترا پر بھیجا اور اب وہ ان کی صحت کا مکمل خیال رکھنے کے لیے سنجیونی یوجنا لے کر آئے ہیں۔ اروند کیجریوال کی اس انقلابی اسکیم کے تحت دہلی میں 60 سال سے زیادہ عمر کے بزرگوں کا علاج مفت ہوگا، چاہے وہ سرکاری ہو یا نجی اسپتالوں میں۔ یہ صرف ایک اسکیم نہیں ہے بلکہ ہمارے بزرگوں کے لیے عزت اور بہتر زندگی کا وعدہ ہے ۔ دہلی کا ہر بزرگ صحت مند اور خوش رہے ، یہی ہمارا مقصد ہے ۔
دہلی کے وزیر اعلیٰ آتشی نے ٹویٹر پر کہا کہ مسٹر کیجریوال کی سنجیونی اسکیم کے تحت دہلی میں 60 سال سے زیادہ عمر کے بزرگوں کا مفت علاج کیا جائے گا۔ اس اسکیم کا رجسٹریشن کچھ دنوں میں شروع ہو جائے گا اور انتخابات کے بعد یہ اسکیم ہمارے دہلی کے بزرگوں کے لیے شروع کی جائے گی۔ ہماری دعا ہے کہ دہلی کا ہر بزرگ صحت مند ہو۔