سرینگر/۹دسمبر
جنوبی کشمیر کے ضلع شوپیاں کو جموں صوبے کے پونچھ اور راجوری اضلاع کے ساتھ جوڑنے والے تاریخی مغل روڈ پر برف جمع ہونے کی وجہ سے پیر کو دوسرے روز بھی ٹریفک کی نقل و حمل بند ہے ۔
ادھر وادی کو لداخ یونین ٹریٹری کے ساتھ جوڑنے والا سونہ مرگ، کرگل روڈ بھی بند ہے تاہم وادی کو ملک کے باقی حصوں کے ساتھ جوڑنے والی سرینگر، جموں قومی شاہراہ پر ٹریفک کی دوطرفہ نقل و حمل حسب معمول جاری ہے ۔
ٹڑیفک حکام نے بتایا کہ مغل روڈ اور سونہ مرگ ، کرگل روڈ پر برف جمع ہونے کی وجہ سے ٹریفک ہنوز بند ہے ۔انہوں نے کہا کہ بیکن حکام سے اجازت ملنے کے بعد یہ ان سڑکوں پر ٹریفک کی آمد و رفت بحال کی جائے گی۔
ان کا کہنا ہے کہ سرینگر،جموں قومی شاہراہ پر ٹریفک کی دو طرفہ نقل و حمل حسب معمول جاری ہے ۔
حکام نے مسافرں سے قومی شاہراہ پر لین ڈسپلن پر عمل کرنے کی تاکید کی ہے ۔
انہوں نے مسافروں سے کہا ہے کہ وہ قومی شاہراہ پر دن کے دوران ہی سفر کریں اور چٹانیں کھسکنے یا مٹی کے تودے گر آنے کے خدشات کے پیش نظر رام بن اور بانہال کے درمیان غیر ضروری طور رکنے سے اجتناب کریں۔
