’ریاستی درجے کی بحالی سے ہی عوام کے مسائل صحیح معنوں میں حل ہوسکتے ہیں‘

سرینگر//
وزیر اعلیٰ‘عمرعبداللہ نے کہا ہے کہ ریاستی درجے کی بحالی سے ہی عوام کے مسائل صحیح معنوں میں حل ہوسکتے ہیں۔’’ نیشنل کانفرنس اپنے منشور پر مضبوطی سے قائم ہے اور عوام سے کئے گئے ہر وعدے کو پورا کرے گی‘‘۔
جموںکشمیر نیشنل کانفرنس صوبہ کشمیر کے ایک خصوصی اجلاس سے خطاب میں وزیر اعلیٰ نے واضح کیا کہ لوگوں سے جتنے بھی وعدئے کئے گئے انہیں ہر حال میں پورا کیا جائے گا۔
عمر عبداللہ نے کہاکہ ریاستی درجہ کی بحالی سے ہی عوام کو حقیقی معنوں میں راحت پہنچائی جاسکتی ہے اور ہمیں اس کے حصول کیلئے سخت محنت کرنی ہوگی۔
خصوصی اجلاس میں جموں وکشمیر کی سیاسی صورتحال پر تبادلہ خیال ہوا۔اس کے علاوہ لوگوں کو درپیش گوناگوں مسائل و مشکلات زیر بحث آئے اور شرکاء نے اپنے اپنے علاقوں کے لوگوں کے مسائل و مشکلات اُجاگر کرنے کے علاوہ پارٹی سرگرمیوں اور زمینی صورتحال سے اجلاس کو آگاہ کیا۔
اجلاس میں لوگوں کی اقتصادی بدحالی خصوصاً عوام کو درپیش سنگین نوعیت کے مسائل و مشکلات پر زبردست تشویش کا اظہار کیا گیا۔ طویل اجلاس میں سبھی شرکائنے اپنی اپنی آرائپیش کی اور نائب صدر و وزیراعلیٰ نے نے سبھی کو بغور سُنا۔
عمر عبداللہ نے پارٹی لیڈران اور عہدیداران پر زور دیا کہ وہ لوگوں کیساتھ قریبی رابطہ رکھیں اور اُن کے مسائل و مشکلات اُجاگر کرنے کے علاوہ ان کا سدباب کرانے میں اپنا رول نبھائیں اور ساتھ ہی نیشنل کانفرنس کے نیا کشمیر منشور اور پارٹی کی مضبوطی کیلئے تن دہی سے کام کریں۔
وزیر اعلیٰ نے کہا کہ نیشنل کانفرنس کے قول و فعل میں کوئی بھی تبدیلی نہیں آئی ہے اور ہم اپنے ایجنڈا پر قائم و دائم ہے ۔
عمرعبداللہ کاکہنا تھا’’سرداری عوام کا حق ہے اور عوام ہی طاقت کا سرچشمہ ہے ، اسی اصول کی بنیاد پر لوگوں نے ہمیں کامیابی عطا کی اور ہمیں ہر حال میں لوگوں کی توقعات پر کھرا اُترنے کی حد درجہ کوشش کرنی ہوگی‘‘۔
وزیر اعلیٰ نے کہا کہ نیشنل کانفرنس اپنے منشو رمیں کئے گئے ایک ایک وعدے کو پورا کرکے عوام کو راحت پہچائے گی۔