چیمپیئنز ٹرافی؛ آئی سی سی بورڈ اجلاس پھر ملتوی، بھارتی ہٹ دھرمی برقرار

کراچی:
چیمپیئنز ٹرافی 2025 کے مستقبل کے حوالے سے آئی سی سی کی بورڈ میٹنگ پھر ملتوی ہوگئی، چیئرمین پی سی بی محسن نقوی اجلاس کے لیے دبئی پہنچے تھے۔
بھارتی ہٹ دھرمی کی وجہ سے چیمپیئنز ٹرافی کے معاملے پر ڈیڈلاک برقرار ہے۔
ذرائع کے مطابق چیمپیئنز ٹرافی پر آئی سی سی کا اجلاس اب 7 دسمبر کو ہوگا اور یہ اس وقت ہوگا جب انڈیا پاکستان کے مؤقف پر جواب دے گا۔ بھارتی بورڈ کی جانب سے جواب نہ ملنے کے سبب آج کا اجلاس ملتوی ہوا۔
آئی سی سی کے نئے سربراہ جے شاہ کی جانب سے اجلاس کو تعارفی قرار دیا جا رہا تھا، تاہم قوی امکان تھا کہ اس موقع پر چیمپیئنز ٹرافی کے حوالے سے مختلف معاملات زیر بحث آئیں گے، میٹنگ میں شیڈول سمیت دیگر امور کے حوالے سے اہم ترین فیصلے بھی متوقع تھے۔
پاکستانی پارٹنر شپ یا فیوژن فارمولے میں بھارت کی عدم دلچسپی سامنے آ چکی ہے۔
ذرائع کا کہنا تھا کہ میٹنگ میں ایونٹ کے معاملات کو حتمی شکل دے دی جائے گی، حیران کن طور پر ایجنڈے میں بھارتی ٹیم کے دورہ پاکستان سے انکار کا معاملہ شامل نہیں تھا۔
ادھر بھارتی کرکٹ ویب سائٹ نے دعویٰ کیا ہے کہ چیمپئنز ٹرافی ہائبرڈ ماڈل پر ہوگی اور بھارت کے میچز دبئی میں ہوں گے۔
بھارتی کرکٹ ویب سائٹ کے مطابق چیمپئنز ٹرافی ہائبرڈ ماڈل پر ہوگی اور آئی سی سی کے بورڈ اجلاس میں ہائبرڈ ماڈل کی منظوری کا امکان ہے۔
کرکٹ ویب سائٹ نے دعوی کیا کہ پاکستان نے ہائبرڈ ماڈل کی بجائے ٹو نیشن فامولا دیا، امکان ہے کہ یو اے ای وہ دوسرا وینیو بنے گا جہاں 15 میں سے 5میچز ہوں گے۔
پاکستان نے چیمپئنز ٹرافی کیلیے ہائبرڈ ماڈل قبول کر لیا، بھارتی میڈیا کا دعویٰ
پاکستان نے ہائبرڈ ماڈل قبول کرنے کے بدلے نیوٹرل وینیو پر بھارت سے 3 ملکی سیریز کھیلنے کی شرط بھی عائد کی۔ بھارت سہہ فریقی سیریز کرانے کا مطالبہ منظور نہیں کرے گا۔
ویب سائٹ کا کہنا ہے کہ بھارت کے تین لیگ میچز ایک سیمی فائنل اور فائنل یو اے ای ہونے کا امکان ہے۔ پاکستان کرکٹ بورڈ نے ماڈل تسلیم کے لیے 4 سے 5 شرائط رکھی ہیں، تاہم پاکستان کی شرائط منظور کیے جانے کا امکان نہیں ہے جبکہ براڈ کاسٹرز کو بھی پاکستان کی شرائط سے اتفاق نہیں وہ بھی مخالفت کریں گے۔