پولیس مہم کے دوران ہی نہیں ‘ہر وقت ٹریفک قوانین کی پیری کی جائے

سرینگر//
ریجنل ٹرانسپورٹ افسر (آر ٹی او) کشمیر سید شہنواز بخاری کا کہنا ہے کہ لوگوں کو صرف پولیس مہم کے دوران ہی نہیں بلکہ ہر وقت ٹریفک قوانین کی پیروی کرنی چاہئے ۔انہوں نے کہا کہ جب تک لوگ اپنی اپنی ذمہ داریوں کو نہیں سمجھیں گے تب تک ہم اپنے اس مشن میں کامیاب نہیں ہوں گے ۔
آر ٹی او نے ان باتوں کا اظہار جمعہ کو یہاں نامہ نگاروں کے ساتھ بات کرنے کے دوران کیا۔
بخاری نے کہا’’پولیس کی طرف سے ٹریفک قوانین پر عمل در آمد کیلئے جاری مہم کے ایک خوش آئند بات ہے اور اس کے اچھے نتائج سامنے آ رہے ہیں‘‘۔
آر ٹی اوکا کہنا تھا’’ہمیں صرف پولیس کے ڈر سے ٹریفک قوانین پر عمل نہیں کرنا چاہئے بلکہ یہ سمجھ کر ایسا کرنا چاہئے کہ یہ ہمارے اور دوسروں کے جانوں کی ضمانت ہے ‘‘۔
بخاری نے کہا کہ دوسروں کی زندگیوں اور حقوق کا تحفظ کرنا تمام مذاہب کی تعلیمات میں شامل ہے لہذا ہمیں بھی ان تعلیمات پر عمل کرنا چاہئے ۔انہوں نے کہا’’جب ہم میں یہ شعور پیدا ہوگا کہ ہم ڈر سے نہیں بلکہ ایک ذمہ دار شہری کی حیثیت سے ٹریفک قوانین کی پیروی کریں تب ہم اپنے مشن میں کامیاب ہوسکتے ہیں‘‘۔
چالانوں کے بارے میں پوچھے جانے پر ان کا کہنا تھا’’چالان ہو رہے ہیں لیکن زیادہ چالان ہونا مسئلہ نہیں ہے بلکہ کم چالان ہونا ہی بہتر صورتحال کی عکاسی کرسکتا ہے‘‘۔
لائسنسز کی اجرائی کے بارے میں آر ٹی او نے کہا کہ دو برسوں کا’بیک لاگ‘تھا کیونکہ ٹنڈر پاس نہیں ہوئے تھے ۔انہوں نے کہا کہ اب یہ کلیئر ہوا ہے اور جلد ہی ہم وقت پر لائسنسز کی فراہمی کو یقینی بنائیں گے ۔