منوج سنہا کی منتخب ممبروں کو مبارکباد، ووٹروں کی سراہنا

سرینگر//
جموںکشمیر کے لیفٹیننٹ گورنر ‘منوج سنہا نے بدھ کے روز اسمبلی انتخابات میں کامیابی حاصل کرنے والے نیشنل کانفرنس کی قیادت والے اتحاد کے اسمبلی ممبروں اور دیگر تمام ممبروں کو مبارکباد پیش کی اور ووٹروں کی سراہنا کی۔
سنہا نے کہا’’میں عوام کی خدمت کے لئے ان تمام اراکین کیلئے نیک خواہشات کا اظہار کرتا ہوں‘‘۔
لیفٹیننٹ گورنر نے ’ایکس‘پر اپنے ایک پوسٹ میں کہا’’ اسمبلی انتخابات میں کامیابی حاصل کرنے والے نیشنل کانفرنس کی قیادت والے اتحاد کے ممبروں اور دیگر تمام ممبروں کو مبارکباد پیش کرتا ہوں‘‘۔انہوں نے کہا’’میں عوام کی خدمت کے تئیں ان کیلئے نیک خواہشات کا اظہار کرتا ہوں‘‘۔
سنہا کا کہنا تھا’’ہندوستان کا آئین ہماری رہنمائی کیلئے روشنی ہے اور میں سب سے گذارش کرتا ہوں کہ وہ جموں و کشمیر کی ترقی اور لوگوں کی فلاح و بہبود کے لیے مل کر کام کریں‘‘۔
ایل جی نے کہا’’پرامن انتخابی عمل اور لاکھوں ووٹروں کی شرکت متحرک جمہوریت اور ملک کی جمہوری اقدار پر عوام کے اعتماد کا منہ بولتا ثبوت ہے ‘‘۔
سنہا نے کہا’’ آج جموں کشمیر گڈ گورننس‘ عوام اول، سماجی انصاف اور سماجی ہم آہنگی کے اصولوں کی رہنمائی میں اونچے مقام پر فائز ہے ‘‘۔
لیفٹیننٹ گورنر نے کہا’’میں جموں کشمیر کے یونین ٹریٹری میں جمہوریت کو بااختیار بنانے اور مضبوط کرنے کیلئے لوگوں کا شکریہ ادا کرتا ہوں‘‘۔
سنہا نے کہا’’میں بیلٹ کے تقدس کو برقرار رکھنے اور شفاف، آزادانہ اور منصفانہ انتخابات کو کامیابی کے ساتھ مکمل کرنے کیلئے انتھک اور تندہی سے کام کرنے کیلئے جموں وکشمیر کے سی ای او، الیکشن کمیشن کے حکام، جموں وکشمیر پولیس اور سیکورٹی فورسز کی کاوشوں کی سراہنا کرتا ہوں۔‘‘