سرحدیں پر امن ہیں کیونکہ پاکستان مودی سے ڈرتا ہے:شاہ

مینڈھر//
مرکزی وزیر داخلہ امیت شاہ نے ہفتہ کے روز کہا کہ جموں کشمیر میں سرحدوں پر اس لئے امن ہے کیونکہ پاکستان وزیر اعظم نریندر مودی سے ڈرتا ہے۔
شاہ مرکز کے زیر انتظام علاقے پونچھ کے اس سرحدی علاقے میں بی جے پی امیدوار مرتضیٰ خان کی حمایت میں ایک انتخابی ریلی سے خطاب کر رہے تھے۔
وزیر داخلہ نے نوجوانوں کے ہاتھوں میں بندوقوں اور پتھروں کی جگہ لیپ ٹاپ اٹھا کر دہشت گردی کا خاتمہ کرنے کے لئے بی جے پی زیرقیادت مرکز کی ستائش کی اور کہا کہ ان کی حکومت جموں خطے کی پہاڑیوں میں بندوقوں کی گونج نہیں ہونے دے گی۔
شاہ نے کہا کہ ہم لوگوں کی حفاظت کے لئے سرحدوں پر مزید بنکر تعمیر کریں گے۔ ’’میں آپ کو۱۹۹۰ کی دہائی میں سرحد پار سے ہونے والی فائرنگ کی یاد دلانا چاہتا ہوں۔ کیا آج سرحد پار سے فائرنگ ہو رہی ہے‘‘؟ان کا مزید کہنا تھا’’اس کی وجہ یہ ہے کہ یہاں کے پہلے کے حکمران پاکستان سے ڈرتے تھے لیکن اب پاکستان مودی سے ڈرتا ہے۔ وہ گولی چلانے کی ہمت نہیں کریں گے لیکن اگر انہوں نے ایسا کیا تو انہیں منہ توڑ جواب دیا جائے گا‘‘۔
وزیر داخلہ تین روزہ دورے پر ہیں اور پونچھ کے سرن کوٹ، راجوری ضلع کے تھانہ منڈی اور راجوری اور جموں ضلع کے اکھنور میں چار اور انتخابی ریلیوں سے خطاب کریں گے۔
جموں و کشمیر میں اگست ۲۰۱۹ میں آرٹیکل ۳۷۰ کی منسوخی اور سابق ریاست کو دو مرکز کے زیر انتظام علاقوں جموں و کشمیر اور لداخ میں تقسیم کرنے کے بعد پہلی بار اسمبلی انتخابات ہو رہے ہیں۔
پہلے مرحلے کی رائے دہی ۱۸ ستمبر کو ہوئی تھی۔ دوسرا مرحلہ ۲۵ستمبر کو ہوگا، اس کے بعد تیسرا اور آخری مرحلہ یکم اکتوبر کو ہوگا۔ انتخابات کے نتائج کا اعلان ۸؍ اکتوبر کو کیا جائے گا۔