سرینگر میں دو افراد کو گرفتار کرکے ایک کلو چرس جیسا مواد بر آمد:پولیس

سرینگر//
معاشرے سے منشیات کی وبا کی بیخ کنی کی مہم کو جاری رکھتے ہوئے سرینگر پولیس نے پیر کے روز دو افراد کو گرفتار کرکے ان کی تحویل سے ایک کلو چرس بر آمد کیا۔
ایک پولیس ترجمان نے تفصیلات فراہم کرتے ہوئے کہا کہ پولیس اسٹیشن کرالہ کھڈ کو ایک مصدقہ اطلاع موصول ہوئی کہ غلام حسن بٹ ولد عبدالرحیم بٹ ساکن میر گنڈ بجبہاڑہ نامی ایک بد نام زمانہ منشیات فروش اپنے ایک اور ساتھی سرتاج احمد گنائی ولد غلام محمد گنائی ساکن بجہاڑہ کے ساتھ ایک لوڈ کیرئر میں کچھ ممنوعہ شئے لے کر ایس پی کالج روڈ سے بر بر شاہ کی طرف آ رہا ہے ۔
ترجمان نے کہا کہ اطلاع موصول ہوتے ہی ایک پولیس پارٹی نے بر برشاہ میں ناکہ لگا دیا اور مذکورہ لوڈ کیرئر کو روک کر اس کی تلاشی لینا شروع کی۔
بیان میں کہا گیا کہ تلاشی کے دوران لوڈ کیرئر سے مذکورہ بالا افراد کی تحویل سے ایک کلو چرس جیسا مواد بر آمد کیا گیا۔انہوں نے کہا کہ دونوں افراد کو گرفتار کیا گیا اور اس ضمن میں ایک کیس درج کرکے مزید تحقیقات شروع کی گئیں۔