اے سی بی ولیج لیول ورکر کو رشوت لیتے ہوئے گرفتار کر لیا

سرینگر//
جموںکشمیر اینٹی کرپشن بیورو (اے سی بی) نے ولیج لیول ورکر بلاک ویلگام کپواڑہ کو۲۰ہزار روپے کی رشوت لیتے ہوئے رنگے ہاتھوں گرفتار کیا۔
اے سی بی کے ایک ترجمان نے بتایا کہ جموں وکشمیر اینٹی کرپشن بیورو (اے سی بی) میں ککروسہ کپواڑہ سے تعلق رکھنے والے شہری نے فون پر شکایت درج کی کہ ولیج لیول ورکر (پی ایم اے وائی’کے تحت آخری قسط جاری کرنے کی خاطر۲۰ہزار روپے کی رشوت طلب کر رہا ہے ۔انہوں نے کہاکہ شکایت کنندہ نے بتایا کہ وہ غریب شخص ہے اور بلاک ڈیلوپمنٹ آفیسر ویلگام نے پی ایم اے وائی کے تحت کیس منظور کیا تھا ۔
ترجمان کے مطابق شکایت کنندہ کو متعلقہ محکمہ سے پہلی قسط میں۵۰ہزار اور دوسری میں ۷۵ہزار روپے بینک کھاتے میں جمع ہوئے ۔انہوں نے مزید بتایا کہ شکایت کنندہ کو آخری قسط کے طورپر پچاس ہزارروپے فراہم کرنے تھے جس سے رہائشی مکان کی تعمیر کا کام مکمل ہوتا لیکن بی ڈی او آفس ویلگام کا کئی مرتبہ دورہ کرنے کے باوجود بھی پیسے جمع نہیں ہوئے ۔انہوں نے کہاکہ متعلقہ بلاک ولیج لیول ورکر نذیر احمد نے لیت ولعل کا مظاہرہ کیا اور آخری قسط واگزار کرنے کی خاطر ۲۰ہزار روپے رشوت طلب کی ۔
اے سی بی کے مطابق شکایت کنندہ نے اینٹی کرپشن بیورو کے ہیلپ لائن نمبر۹۴۱۹۶۷۸۰۶۰پر رابط قائم کرکے اس بارے میں جانکاری فراہم کی۔
شکایت موصول ہونے کے بعد اینٹی کرپشن بیورو نے ولیج لیول ورکر کے خلاف کیس درج کرکے تحقیقات شروع کی ۔انہوں نے بتایا کہ ڈی ایس پی رینک کے آفیسر کی سربراہی میں ایک ٹیم نے جال بچھایا جس دوران نذیر احمد نامی ولیج لیول ورکر کو سائل سے۲۰ہزار روپے کی رشوت لیتے ہوئے رنگے ہاتھوں گرفتار کیا گیا۔اے سی بی کے مطابق آزاد گواہوں کی موجودگی میں ولیج لیول ورکر کے قبضے سے۲۰ہزار روپے کی رقم برآمد کرکے ضبط کی گئی۔انہوں نے کہاکہ اس سلسلے میں مزید تحقیقات جاری ہے ۔