سرینگر//
مرکز کے زیر انتظام جموںکشمیر اور لداخ میں یوم آزادی کی تقریبات کے انعقاد کیلئے سیکورٹی کے سخت انتظامات کئے گئے ہیں۔
جموںکشمیر بالخصوص وادی کشمیر کے میدانی علاقوں میں ملی ٹنٹوں کی سرگرمیوں پر روک لگانے کے لئے تلاشیوں اور گشت کا سلسلہ گزشتہ کئی ہفتوں سے جاری ہے جبکہ ایل او سی اور بین الاقوامی سرحد پر دراندازی کی کسی بھی کوشش کو ناکام بنانے کے لئے فوجی اہلکاروں کو الرٹ حالت میں رکھا گیا ہے ۔
سرکاری ذرائع نے بتایا کہ جموں وکشمیر کے دونوں دارلحکومتوں میں ہونے والی تقریبات کے انتظامات کو حتمی شکل دے دی گئی ہے ۔
گرمائی دارلحکومت سرینگر ‘جہاں بخشی اسٹیڈئم میں یوم آزادی کی مرکزی تقریب منعقد ہوگی جس میں لیفٹیننٹ گورنر منوج سنہا پرچم کشائی کی رسم انجام دیں گے ، کے اردگرد سخت سیکورٹی پہرہ بٹھا دیا گیا ہے ۔ اسی طرح سرمائی دارلحکومت جموں میں ایل جی کے مشیر بھٹناگر پرچم کشائی کی رسم انجام دیں گے ، کو بھی سخت سیکورٹی حصار میں لیا گیا ہے ۔
شہر سری نگر میں جگہ جگہ پر ناکے بٹھا ئے گئے ہیں جہاں نہ صرف ہر آنے جانے والی گاڑیوں بالخصوص دو پہیہ گاڑیوں کی تلاشی لی جاتی ہے ، بلکہ ان میں سوار افراد کی جامہ تلاشی لینے کے علاوہ ان سے پوچھ گچھ کی جاتی ہے ۔
پولیس کے ایک سینئر آفیسر نے کہاکہ جموں وکشمیر میں یوم آزادی کی تقریبات کے لئے سیکورٹی کے معقول انتظامات کئے گئے ہیں۔ انہوں نے بتایا کہ سرحدوں پر تعینات فوجی مستعد ہیں اور دراندازی کی کسی بھی کوشش کو ناکام بنانے کے اہل ہیں۔
صوبہ جموں میں تعینات پولیس کے ایک سینئر عہدیدار نے بتایا کہ تقریبات کے احسن انعقاد کو یقینی بنانے کے لئے تمام درکار اقدامات اٹھائے گئے ہیں۔ ان کا کہنا تھا کہ سیکورٹی کو ہر سال۱۵؍اگست کے موقع پر ہائی الرٹ پر رکھا جاتا ہے ۔ تقریبات کے احسن انعقاد کو یقینی بنانے کے لئے تمام درکار اقدامات اٹھائے گئے ہیں۔
ادھر سری نگر اور وادی کے دوسرے اضلاع میں راہگیروں کی جامہ تلاشیوں اور گاڑیوں کی چیکنگ کا عمل گزشتہ کئی ہفتوں سے جاری ہے ۔ کسی بھی ناگہانی واقعہ سے نمٹنے کے لئے بخشی اسٹیڈئم کے گرد نواح میں جموں وکشمیر پولیس اور نیم فوجی دستوں کی بھاری نفری کو تعینات کیا گیا ہے جبکہ اسٹیڈیم کے قریب واقع اونچی عمارتوں پر ماہر نشانہ بازوں کو بھی تعینات کیا گیا ہے ۔
اسٹیڈئم کے باب الداخلہ کو بھی کانٹے دار تار سے بند رکھا گیا ہے اور صرف سیکورٹی فورسز کی گاڑیوں کو ہی اندر جانے کی جازت دی جارہی ہے ۔ اسٹیڈئم کے گرد نواح میں کئی ایک حساس مقامات پرمشتبہ افراد کی نقل وحرکت پر قریبی نگاہ رکھنے کے لئے سی سی ٹی وی کیمرے نصب کئے گئے ہیں اور بیلٹ پروف گاڑیاں تعینات کردی گئی ہیں۔
سیکورٹی فورس اور جموں وکشمیر پولیس کے اہلکاروں نے یوم آزادی کی تقریب سے قبل ملی ٹینٹوں کے کسی بھی حملے کو ناکام بنانے کے لئے اسٹیڈیم کے تین کلومیٹر دائرے مٰں آنے والے علاقوں میں شبانہ گشت بھی تیز کیا ہے ۔
یوم آزادی کی تقریبات کے پر امن انعقاد کو یقینی بنانے کے لئے وادی کے اطراف واکناف بالخصوص مختلف اضلاع کو گرمائی دارلحکومت کے ساتھ جوڑنے والی سڑکوں پر سیکورٹی فورسز اور پولیس کے خصوصی ناکے بٹھا ئے گئے ہیں جہاں چھوٹی بڑی گاڑیوں کو روک کر ان کی تلاشی لی جاتی ہے اور ان میں سوار مسافروں کی جامہ تلاشی لینے کے علاوہ شناختی کارڈ چیک کئے جاتے ہیں۔
