ممتا بنرجی کے بیان پر بنگلہ دیش حکومت نے سخت اعتراض کیا

کلکتہ// شیخ حسینہ کی حکومت نے بنگلہ دیش سے متعلق مغربی بنگال کی وزیر اعلیٰ ممتا بنرجی کے تبصروں پر برہمی کا اظہار کیا ہے ۔ بنگلہ دیش کی حکومت کے مطابق حکومت ہند کے سامنے احتجاج درج کرایا گیا ہے ۔
بنگلہ دیش حکومت کا دعویٰ ہے کہ ممتا کے الفاظ نے کنفیوژن پیدا کر دی ہے ۔ بنگلہ دیش کے وزیر خارجہ حسن محمود نے منگل کو کہاکہ ممتا بنرجی کے حوالے سے ، میں کہنا چاہتا ہوں کہ ان کے بیان کی وجہ سے کنفیوژن پھیل گئی ہے ، انہوں نے یہ بھی کہا کہ اس سلسلے میں ہندوستانی حکومت کو ایک نوٹ دیا گیا ہے ۔
اتوار کو دھرمتلہ میں 21 جولائی کی میٹنگ سے ممتا نے بنگلہ دیش میں حالیہ بدامنی کے بارے میں کہا کہ اگر پڑوسی ملک سے کوئی آتا ہے اس کے لئے ہمارے دروازے کھلے ہیں ۔ اگر کوئی مغربی بنگال کے دروازے پر آئے گا تو وہ پیچھے نہیں ہٹیں گی۔ لیکن ساتھ ہی انہوں نے کہا کہ وہ اس بارے میں زیادہ نہیں کہہ سکتی ہیں۔ کیونکہ بنگلہ دیش ایک آزاد ملک ہے ۔ انہوں نے یہ بھی بتایا کہ اگر اس بارے میں کچھ بھی مرکزی حکومت ہی بولے گی۔ اس تبصرے کے بعد سے ہی بی جے پی نے سخت تنقید کی ہے ۔
پیر کو بی جے پی لیڈر اور سابق مرکزی وزیر روی شنکر پرساد نے کہا کہ ممتا حملے کو جائز قرار دینا چاہتی ہیں۔ ایسے معاملات پر کارروائی کی پوری ذمہ داری صرف حکومت ہند کی ہے ۔ روی شنکر نے اس تناظر میں شہریت ترمیمی قانون (CAA) کا بھی ذکر کیا۔ ترنمول لیڈر کنال گھوش نے سابق مرکزی وزیر کے بیان کا جواب دیتے ہوئے انہوں نے کہا کہ بی جے پی وزیر اعلیٰ کے الفاظ کو توڑ مروڑ کر بے بنیاد الزامات لگا رہی ہے ۔ انہوں نے انسانیت کی خاطر اقوام متحدہ کے قوانین کا حوالہ دیا۔
دوسری جانب بنگال کے گورنر سی وی آنند بوس نے بنگلہ دیش پر ممتا کے تبصروں پر رپورٹ طلب کی ہے ۔ راج بھون کے آفیسر آن اسپیشل ڈیوٹی نے پیر کو اپنے دفتر کے میڈیا سیل کے X ہینڈل پر اس کی اطلاع دی ہے ۔ بنگلہ دیشی حکومت نے الزامات اور جوابی الزامات کے درمیان ممتا کے الفاظ پر اعتراض کیا۔بنگلہ دیش میں کوٹا سسٹم کے خلاف تحریک جاری ہے ۔