صورہ اور اونتی پورہ میں شبانہ تصادم آرائیوں کے دوران ۴ جنگجو ہلاک:آئی جی کشمیر

سرینگر/۲۷مئی
جموں وکشمیر کی گرمائی راجدھانی سرینگر کے صورہ علاقے میں شبانہ تصادم آرائی کے دوران سیکورٹی فورسز نے حال ہی میں ملی ٹینٹ صفوں میں شمولیت اختیار کرنے والے۲جنگجووں کو مار گرانے کا دعویٰ کیا۔
دریں اثنا اونتی پورہ میں میں بھی سیکورٹی فورسز کے ساتھ رات بھر جاری رہنے والی جھڑپ میں۲ملی ٹینٹ مارے گئے ۔
آئی جی کشمیر نے بتایا کہ سرینگر اور اونتی پورہ میں تصادم آرائیوں کے دوران مارے گئے چار جنگجووں نے حال ہی میں ملی ٹینٹ صفوں میں شمولیت اختیا رکی تھی۔پولیس کے ایک ترجمان نے بتایاکہ سیکورٹی فورسز نے مصدقہ اطلاع موصول ہونے کے بعد درمیانی شب کو سری نگر کے صورہ علاقے کو محاصرے میں لے کر تلاشی آپریشن شروع کیا۔
ترجمان نے بتایا کہ جوں ہی سیکورٹی فورسز کے اہلکار مشتبہ مقام کے نزدیک پہنچے تو وہاں پر موجود جنگجووں نے حفاظتی عملے پر اندھا دھند فائرنگ شروع کی۔اُن کے مطابق سلامتی عملے نے بھی پوزیشن سنبھال کر جوابی کارروائی کا آغاز کیا جس دوران شدید گولیوں کا تبادلہ شروع ہوا۔
پولیس ترجمان نے بتایا کہ فورسز کی جوابی کارروائی میں دو ملی ٹینٹ مارے گئے جن کے قبضے سے اسلحہ وگولہ بارود اور قابل اعتراض مواد برآمد کرکے ضبط کیا گیا۔
پولیس ترجمان کے مطابق مارے گئے جنگجووں کی شناخت شاکر احمد وازہ اور آفرین آفتاب ملک کے بطور ہوئی ہے اور انہوں نے حال ہی میں ملی ٹینٹ تنظیموں میں شمولیت اختیا ر کی تھی۔
دریں اثنا اونتی پورہ میں جمعرات دیر شام سیکورٹی فورسز اور جنگجووں کے مابین تصادم چھڑ گیا جس کے بعد فورسز نے ایک وسیع علاقے کو محاصرے میں لے کر فرار ہونے کے راستے سیل کئے ۔
پولیس ترجمان نے بتایا کہ جمعے اعلیٰ الصبح سیکورٹی فورسز کی جوابی کارروائی میں یہاں پر بھی دو ملی ٹینٹ مارے گئے جن کی بعد میں شناخت شاہد مشتاق بٹ ساکن ہفرو چاڈورہ بڈگام اور فرہان حبیب ساکن ہکری پورہ پلوامہ کے بطور ہوئی ہے ۔انہوں نے بتایا کہ مہلوک جنگجو ٹی وی آرٹسٹ امبرین کے قتل میں براہ راست ملوث تھے ۔
آئی جی کشمیر وجے کمار نے بتایا کہ صورہ سری نگر او راونتی پورہ میں تصادم آرائیوں کے دوران چار جنگجو مارے گئے ۔انہوں نے بتایا کہ حشرو چاڈورہ میں ملی ٹینٹوں کے ہاتھوں قتل کی گئی ٹی آرٹسٹ امبرین کے قتل کا معمہ محض ۲۴گھنٹوں کے دوران حل کیا گیا ۔
اُن کے مطابق پچھلے تین روز کے دوران سیکورٹی فورسز کے ساتھ تصادم آرائیوں کے دوران ۱۰ملی ٹینٹ ہلاک ہوئے ہیں۔
اونتی پورہ تصادم کے بارے میں انسپکٹر جنرل آف پولیس کشمیر رینج وجے کمار نے بتایا کہ تصادم کے دوران شاہد مشتاق بٹ ساکن ہفرو چاڈورہ اور فرہان حبیب ساکن ہکری پورہ پلوامہ مارے گئے ۔انہوں نے بتایا کہ لشکر کمانڈر لطیف کی ہدایت پر مہلوک جنگجووں نے حشرو چاڈورہ میں ٹی وی آرٹسٹ کا قتل کیا۔
آئی جی پی کے مطابق تصادم کی جگہ ایک اے کے۵ ۶رائفل ، چار میگزین اور ایک پستول کو برآمد کرکے ضبط کیا گیا۔انہوں نے کہاکہ تین روز کے دوران دس جنگجووں کو جھڑپوں کے دوران مار گرایا گیا جن میں سے تین جیش اور سات لشکر طیبہ نامی ملی ٹینٹ تنظیم کے ساتھ وابستہ تھے ۔