یاسین ملک کے گھر کے باہر ملک مخالف نعرہ بازی کرنے والے۱۰ملزمان گرفتار:پولیس

سرینگر//
سرینگر پولیس نے جموں کشمیر لبریشن فرنٹ کے رہنما یاسین ملک کے گھر واقع مائسمہ کے باہر بدھ کو ملک مخالف نعرہ بازی کرنے اور پتھر بازی کے الزام میں دس افراد کو گرفتار کیا ہے ۔
پولیس نے نوجوانوں سے ایک بار پھر ایسی سرگرمیاں انجام دینے سے باز رہنے کی اپیل کی ہے جو ان کے کیرئیر کیلئے ضرر رساں اور ان کے اہل خانہ کیلئے باعث پریشانی ہیں۔
سرینگر پولیس نے اپنے ٹویٹر ہینڈل پر ٹویٹ کرتے ہوئے کہا کہ مائسمہ میں یاسین ملک کے گھر کے باہر ملک مخالف نعرہ بازی کرنے اور پتھر بازی کرنے والے دس ملزموں کو گرفتار کیا گیا ہے ۔
ٹویٹ میں کہا گیا’’باقی تمام علاقے پر امن رہے نوجوانوں سے ایک بار گذارش کی جاتی ہے کہ وہ ایسی سرگرمیاں انجام نہ دیں جو ان کے کیرئر کو تباہ کر سکتی ہیں اور ان کے اہل خانہ کیلئے پریشانی کا باعث ہیں‘‘۔
پولیس نے ایک اور ٹویٹ میں کہا کہ نعرہ بازی اور سنگ بازی میں ملوث باقی افراد کی شناخت معلوم کی جا رہی ہے اور ان کو بھی بہت جلد گرفتار کیا جائے گا۔
ٹویٹ میں کہا گیا’’یو اے پی اے اور آئی پی سی کے تحت کیس درج کیا گیا ہے اور اس غنڈہ گردی کو بھڑکانے والوں کے خلاف پی ایس اے کے تحت مقدمہ درج کیا جائے گا‘‘۔
ٹویٹ میں مزید کہا گیا’’ایسی ملک مخالف سرگرمیوں اور اشتعال انگیز حرکات کے ساتھ ہمیشہ سختی اور قانون کی پوری طاقت کے ساتھ نمٹا جائے گا۔‘‘