حالیہ لوک سبھا انتخابات کی سب سے بڑی بات کیا ہے؟ نہیں صاحب سب سے بڑی بات مودی جی کا تیسری باروزیر اعظم بننا نہیں ہے… یقینا یہ بھی بڑی بات ہے‘ لیکن…لیکن کشمیر کے حوالے سے ان انتخابات کی جو سب سے بڑی بات رہی وہ یہ ہے کہ اے ‘ بی ‘ سی ٹیموں کا حال بے حال ہوا … لوگوں نے انہیں آئینہ دکھادیا… انہیں ان کی اوقات یاد دلادی … اور ہمیں یقین ہے کہ اے ‘ بی اور سی ٹیموں کو اب اپنی اوقات یاد رہے گی اور… اور وہ اب جب بھی زبان کھولیں گی… کچھ بولیں گی تو… تو اپنی حد سے تجاوز نہیں کریں گی … بالکل بھی نہیں کریں گی …اور اس لئے نہیں کریں کہ… کہ ایک آدھ حلقوں … اسمبلی حلقوں کو چھوڑ کر انہیں ہر حلقے میں شکست فاش کا سامنا کرنا پڑا… ان کے امیدواروں کی ضمانتیں ضبط ہو ئیں… لون… سجاد لون کی قسمت اچھی تھی جو… جو ان کی ضمانت ضبط ہو تے ہوتے رہ گئی… لیکن… لیکن پھر وہ بھی اس ہار … اس شکست فاش کو برداشت نہ کر سکے اور… اور ایسے غائب ہو گئے…جیسے گدھے کے سر سے سینگ غائب ہو تے ہیں… فرق یہ ہے کہ گدھے کے سینگ اس کے سر سے ہمیشہ غائب رہتے ہیں… ہمیں امید ہے کہ… کہ سجاد صاحب سیاسی منظر نامنے سے ہمیشہ کیلئے غائب نہیں ہوں گے بلکہ… تھوڑا سا ادھر اُدھر ٹہلنے کے بعد دو بارہ منظر عام پر آئیں گے… اور انہیں آنا بھی چاہئے… لیکن… لیکن ہم امید کرتے ہیں کہ انہوں نے اس ہار … اس شکست فاش سے ضرور کچھ سیکھا ہو گا… جس طرح اُنہوں نے کچھ سیکھ لیا ہو گا جن کی کشمیر میں اے ‘ بی اور سی ٹیمیں ہیں…ممکن ہے کہ ای اور ایف بھی ہوں ۔اپنے بخاری صاحب … الطاف بخاری صاحب یوں تو کشمیر کی روایتی سیاسی جماعتوں کو منظر نامے سے ہٹا کر ایک نئی روایت لکھنے کا خواب دیکھ رہے تھے … اور اللہ میاں کی قسم دن میں ہی دیکھ رہے تھے … لیکن… لیکن یہ صاحب ایک بات بھول گئے تھے… اپنے کشمیر کے بارے میں بھول گئے تھے کہ… کہ کشمیری روایت پسند ہیں… کشمیری عام طور پر اپنی روایتوں سے انحراف نہیں کرتے ہیں… انہیں فراموش نہیں کر تے ہیں… انہیں یاد رکھتے ہیں… انہیں بھول نہیں جاتے ہیں… اگر ایسا نہیں ہو تا تو… تو اے ‘ بی اور سی ٹیموں کے امیدواروں کی ہول سیل میں ضمانتیں ضبط نہیں ہو تیں… بالکل بھی نہیں ہو تیں …اور کشمیر میں حالیہ لوک سبھا انتخابات کی یہیں سب سے بڑی بات ہے ۔ ہے نا؟