چار جنگجوئوں کے خاکے جاری کئے ۲۰لاکھ روپیوں کے انعام کا اعلان

جموں//
جموں وکشمیر پولیس نے ضلع ڈوڈہ میں ہونے والی ملی ٹنٹ سرگرمیوں میں ملوث چار جنگجوئوں کے خاکے جاری کئے ہیں اور ان کے متعلق جانکاری فراہم کرنے والے کو ۲۰لاکھ رویے انعام دینے کا اعلان کیا ہے ۔
ڈوڈہ پولیس نے ’ایکس‘پر خاکے جاری کرکے کہا ہے ’ڈوڈہ پولیس چار دہشت گردوں کے خاکے جاری کرتی ہے جو بھدرواہ، ٹھاٹھری اور گنڈوہ کے بالائی علاقوں میں گھوم رہے ہیں اور دہشت گردی سے متعلق سرگرمیوں میں ملوث ہیں‘۔
پولیس نے کہا کہ پولیس ہر دہشت گرد کے متعلق اطلاع فراہم کرنے والے کو۵لاکھ روپے انعام دے گی۔
ڈوڈہ پولیس نے ’ایکس‘پر مختلف افسروں کے فون نمبرات بھی شیئر کئے ہیں اور لوگوں سے کہا گیا ہے کہ وہ کسی بھی مشکوک نقل وحمل کے متعلق ان نمبرات کے ساتھ رابطہ کریں۔
ادھر ڈوڈہ میں ہونے والے حملوں میں ملوث جنگجوئوں کی تلاش کیلئے وسیع پیمانے پر تلاشی آپریشن جاری ہے ۔