اننت ناگ میں دہشت گرد معاون کا دو منزلہ رہائشی مکان قرق:پولیس

سرینگر/۱۳جون
جموںکشمیر پولیس نے جنوبی کشمیر کے ضلع اننت ناگ میں ایک جنگجومعاون کے دومنزلہ رہائشی مکان کو منسلک کر دیا۔
جنگجو معاون کی شناخت ریاض احمد بٹ ولد غلام نبی بٹ ساکن لوہر سنزی گڈول کے طور پر کی گئی ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا”دہشت گردانہ کارروائیوں کے خلاف کریک ڈاﺅن کو جاری رکھتے ہوئے اننت ناگ پولیس نے ریاض احمد بٹ ولد غلام نبی بٹ ساکن لوہر سنزی گڈول نامی ایک دہشت گرد معاون کے دو منزلہ رہائشی مکان کو قرق کر دیا“۔
ترجمان نے کہا کہ رہائشی مکان قرق کرنے کی یہ کارروائی صوبائی کمشنر کشمیر سے تصدیق حاصل ہونے کے بعد یو اے پی اے 1967 کے تحت انجام دی گئی۔
بیان میں مزید کہا گیا کہ اس مکان کے متعلق پولیس اسٹیشن کوکرناگ میں یو اے پی اے کے متعلقہ دفعات کے تحت ایک ایف آئی آر نمبر 109/2023درج ہے ۔
ترجمان نے کہا”یہ کارروائی اننت اگ پولیس کے دہشت گردی سے نمٹنے اور ان مذموم سرگرمیوں کو فعال کرنے والے سپورٹ سسٹم کو ناکام بنانے کے عزم کا اعادہ کرتی ہے “۔
بیان میں کہا گیا”حکام دہشت گردوں کے معاونین کے اثاثوں کو نشانہ بنا کر دہشت گرد کارروائیوں کو فنڈ اور سہولیات فراہم کرنے والوں کی صلاحیتوں کو کمزور کرنا چاہتے ہیں۔“