نئی دہلی//
بھارتیہ جنتا پارٹی (بی جے پی) کی زیرقیادت قومی جمہوری اتحاد (این ڈی اے) کے نومنتخب ارکان پارلیمنٹ نریندر مودی کو اپنا لیڈر منتخب کرنے کے لیے جمعہ کو ملاقات کریں گے، جس سے ان کے تیسری مدت کے لیے وزیر اعظم کے طور پر حلف لینے کی راہ ہموار ہوگی۔
حلف برداری اتوار کو ہونے کا امکان ہے۔
این ڈی اے ارکان پارلیمنٹ کے طور پر مودی کے منتخب ہونے کے بعد تلگو دیشم پارٹی کے این چندرا بابو نائیڈو اور جنتا دل یونائیٹڈ کے نتیش کمار جیسے اتحاد کے سینئر ارکان صدر دروپدی مرمو سے ملاقات کے لئے وزیر اعظم کے ساتھ ملاقات کریں گے تاکہ انہیں ان کی حمایت کرنے والے ارکان پارلیمنٹ کی فہرست پیش کی جاسکے۔
ذرائع نے مزید کہا کہ مودی ہفتے کے آخر میں، ممکنہ طور پر اتوار کو حلف اٹھا سکتے ہیں۔
این ڈی اے کے پاس ۲۹۳ ارکان پارلیمنٹ ہیں جو ۵۴۳ رکنی لوک سبھا میں اکثریت کے نشان ۲۷۲ سے زیادہ ہیں۔
مرکزی وزراء امیت شاہ اور راج ناتھ سنگھ سمیت بی جے پی کے سینئر رہنماؤں نے جمعرات کو دن بھر تبادلہ خیال کیا اور جے ڈی یو کے ایک سینئر لیڈر نے مطالبہ کیا کہ ان کی پارٹی کو مرکزی کابینہ میں باعزت نمائندگی ملنی چاہئے۔
جے ڈی یو لیڈر اور بہار کے دیہی ترقی کے وزیر شرون کمار نے پٹنہ میں پی ٹی آئی کو بتایا ’’ کابینہ میں نمائندگی کے معاملے کا فیصلہ وزیر اعظم نریندر مودی اور ہماری پارٹی کے سربراہ نتیش کمار جی کریں گے۔ یہ قابل احترام ہونا چاہئے‘‘۔
ذرائع کے مطابق وزیر اعظم مودی کی حلف برداری کی تقریب ۹ جون کی شام کو ہونے کا امکان ہے۔ قبل ازیں یہ تقریب ۸جون کو ہونی تھی لیکن اب یہ اتوار کی شام۶ بجے منعقد ہوسکتی ہے۔
بنگلہ دیش کی وزیر اعظم شیخ حسینہ، سری لنکا کے صدر رانیل وکرم سنگھے اور نیپال کے وزیر اعظم پشپا کمل دہل سمیت عالمی رہنما تقریب میں شرکت کریں گے۔
ذرائع کا کہنا ہے کہ دیگر ممالک کے سربراہان مملکت کے شیڈول کو مدنظر رکھتے ہوئے حتمی تاریخ اور وقت پر ابھی کام کیا جا رہا ہے۔ آج دن کے آخر تک ان کے شیڈول مکمل ہونے کے بعد ، حتمی تاریخ اور وقت کو حتمی شکل دی جاسکتی ہے۔ ذرائع نے بتایا کہ اگر اتوار کی شام تک کئی معزز ین کو روانہ ہونا ہے تو اتوار کی صبح راشٹرپتی بھون میں تقریب منعقد کرنے کا بھی امکان ہے۔
دریں اثنا تلگو دیشم پارٹی کے سربراہ این چندرا بابو نائیڈو کی آندھرا پردیش کے وزیر اعلی کے طور پر حلف برداری ۹ جون سے ۱۲جون تک ملتوی ہونے کا امکان ہے کیونکہ انہیں پہلے وزیر اعظم نریندر مودی کی حلف برداری میں شرکت کرنی ہے۔
اس دوران تلگودیشم پارٹی کے سربراہ چندرابابو جمعہ کو دوبارہ دہلی کا دورہ کریں گے جہاں وہ این ڈی اے اتحادیوں کے اجلاس میں شرکت کریں گے ۔ تلگودیشم پارٹی کے ارکان پارلیمنٹ کو مودی کی حلف برداری کی تقریب میں شرکت کے لیے پہلے ہی دعوت نامہ موصول ہو چکا ہے ۔
لوک سبھا انتخابات میں تلگودیشم نے۱۶حلقوں پر کامیابی حاصل کی تھی۔اے پی کی حکمران پارٹی اس طرح این ڈی اے اتحاد کا اہم حصہ بن گئی ہے ۔ دوسری جانب چندرا بابو کی قیام گاہ پر سیکورٹی بڑھا دی گئی ہے ۔ گنٹور ضلع کے دو اے ایس سی کی ہدایت پر حفاظتی اقدامات کیے گئے تھے ۔ ایم ایل ایز، ایم پیز اور عہدیدار چندرا بابو سے ملنے آرہے ہیں۔
