حج۲۰۲۴: وزٹ ویزے پر مکہ میں مقیم ۲۰ہزار افراد کے خلاف کارروائی

سرینگر//
ادارہ امن عامہ کا کہنا ہے کہ ’تمام اقسام کے وزٹ ویزے پر آنے والوں کے لیے مکہ میں رہنا غیرقانونی ہے۔ اب تک ۲۰ ہزار سے زائد افراد کے خلاف کارروائی کی جاچکی ہے۔‘
سعودی خبررساں ایجنسی ’ایس پی اے ‘کے مطابق وزارت داخلہ کی جانب سے جاری اعلامیے میں کہا گیا ہے کہ۱۵؍ ذوالقعدہ بمطابق ۲۳مئی ۲۰۲۴ سے۱۵ ذوالحجہ بمطابق۲۱ جون تک وزٹ ویزے پر آنے والوں کو مکہ میں رہنے کی اجازت نہیں۔
’خلاف ورزی کرنے والوں پر حج ضوابط کا اطلاق کیا جائے گا۔ وزٹ ویزے پرآنے والوں کو چاہے کہ وہ کسی دوسرے شہر منتقل ہوجائیں بصورت دیگر ان کے خلاف قانونی کارروائی کی جاتی ہے۔‘
واضح رہے کہ وزارت حج کی جانب سے جاری ضوابط کے تحت پرمٹ کے بغیر کسی کو مکہ میں جانے کی اجازت نہیں ہے۔
ادارہ امن عامہ کی جانب سے بھی وضاحت کی گئی ہے کہ جو بھی حج سیزن میں پرمٹ کے بغیر مکہ شہر یا مشاعر مقدسہ میں ہو گا وہ قانون شکنی کا مرتکب ہوگا ایسے افراد کے خلاف کارروائی کی جائے گی۔
ایسے غیرملکی جن کے اقامے مکہ سے جاری ہوئے ہیں اور ان کی رہائشی یا کام مکہ میں ہے وہ مکہ جاسکتے ہیں جبکہ دیگر افراد جن کے اقامے دیگر شہروں کے ہیں انہیں مکہ میں جانے کے لیے لازمی پرمٹ حاصل کرنا ہو گا بصورت دیگر ان پر خلاف ورزی کا اطلاق کیا جائے گا۔
سعودی وزارت داخلہ نے کہا ہے کہ مکہ مکرمہ میں غیر قانونی طور پر داخلے پر سزاؤں کا نفاذ اتوار ۲جون سے ہوگا۔
سبق ویب سائٹ کے مطابق وزارت نے کہا ہے کہ ’مذکورہ تاریخ کے بعد پر وہ شخص جو اجازت نامے کے بغیر مکہ مکرمہ یا مشاعر مقدسہ میں پکڑا جائے اسے قانون کے مطابق سزا دی جائے گی‘۔
وزارت نے کہاہے کہ ’اجازت نامے کے بغیر مکہ مکرمہ یا مشاعر مقدسہ میں داخلہ غیر قانونی حج شمار کیا جائے گا جس کی سزا ۱۰ ہزار ریال جرمانہ ہے جبکہ غیر ملکی کو ملک سے بیدخل کرکے بلیک لسٹ کردیا جائے گا‘۔
وزارت نے کہا ہے کہ ’سزاؤں کا نفاذ دو جون سے۲۰ جون تک ہوگا‘۔
وزات نے کہا ہے کہ ’اجازت نامے کے بغیر عازمین کو مکہ لے جانے والے کو ۶ ماہ قید اور۵۰ ہزار ریال جرمانہ ہوگا جبکہ گاڑی ضبط کی جائے گی‘۔
’’اگر خلاف ورزی کرنے والا غیر ملکی ہوا تو اسے سزا کی مدت مکمل کرنے کے بعد ملک سے بیدخل کردیا جائے گا ۔‘‘
اس دوران مصری سیاح محمد فریضہ حج کی ادائیگی کے لیے سائیکل پر۱۷۰۰کلومیٹر کا سفر۲۶دن میں طے کر مکہ پہنچا تاہم اسے کو راستے میں ایک حیرت انگیز چیز کا سامنا ہوا۔
عرب میڈیا اخبار ۲۴کے مطابق مصر کا شہری محمد جس نے گزشتہ ماہ قاہرہ سے سعودی عرب کے لیے سائیکل پر اپنے سفر کا آغاز کیا تھا اور۱۷۰۰کلومیٹر کا سفر ۲۶دن میں طے کرکے مکہ مکرمہ پہنچا اس کو راستے میں جن تجربات سے گزرنا پڑا وہ انتہائی سنسنی خیز رہے ۔
نوجوان سیاح نے بتایا کہ اس نے مصر سے سعودی عرب تک کا سفر تنہا سائیکل پر کیا تاہم اس دوران کچھ خطرناک اور غیر معمولی واقعات بھی پیش آئے ۔
محمد نے بتایا کہ سفر کے آغاز میں ایک وقت ایسا آیا کہ رات کے وقت مجھے محسوس ہوا کہ سائیکل پر میرے علاوہ کوئی اور بھی بیٹھا ہے ، جس کی وجہ سے میری رفتار کم ہو گئی تھی۔
مصری سیاح جو پیشے کے لحاظ سے انٹیریئر ڈیکوریٹر ہیں نے اپنے سفر کا آغاز مصر کی مغربی کمشنری سے کیا جہاں سے وہ قاھرہ پہنچے اور بحری جہاز میں اردن کی بندرگاہ العقبہ پر اترے جہاں سے وہ تبوک آئے اور پھر تیما، خیبر سے گزرتے ہوئے مدینہ منورہ پہنچے اور وہاں چند دن قیام کے بعد مکہ مکرمہ کے لیے عازم سفر ہوئے ۔
محمد نے راستے میں الجموم میں لوگوں کی غیر معمولی میزبانی کو سراہا اور کہا کہ فریضہ حج کی ادائیگی کے بعد وہ سائیکل پر ہی خیلجی ملک کا سفر کریں گے جو ۴۱۰۰کلومیٹر طویل ہوگا۔