وستارا پرواز میں بم کی دھمکی کے بعد فلائٹ آپریشن ایک گھنٹے تک معطل

سرینگر//
سرینگر بین الاقوامی ہوائی اڈے پر جمعہ کو بم کی دھمکی کے پیش نظر حکام نے فلائٹ آپریشن کو ایک گھنٹے کیلئے بند کر دیا۔
اطلاعات کے مطابق جمعے کے روز سری نگر بین الاقوامی ائر پورٹ پر اس وقت حکام کو فلائٹ آپریشن ایک گھنٹے کے لئے بند کرنا پڑا جب ائیر ٹریفک کنٹرول (اے ٹی سی) سری نگر کو ایک دھمکی آمیز کال موصول ہوئی۔
ذرائع نے بتایا کہ سری نگر بین الاقوامی ہوائی اڈے پر جمعے کے روز وستارا کی پرواز(یو کے ۶۱۱)کو بم کی دھمکی کے پیش نظر حکام نے فوری کارروائی عمل میں لاکر قائم کردہ حفاظتی پروٹوکول کے بعد سی آئی ایس ایف نے طیارے کو فوری طورپر خالی کرایا اور بڑے پیمانے پر تلاشی لی۔
ذرائع نے مزید بتایا کہ مسافروں اور عملے کے ارکان کو محفوظ مقام پر لے جاکر بم ناکارہ بنانے والی ٹیم ، سراغ رساں کتوں کی تعیناتی عمل میں لائی گئی تاکہ ہوائی جہاز کا بغور معائنہ کیا جاسکے ۔ان کا مزید کہنا تھا کہ طیارے کی مکمل تلاشی کے بعد جہاز میں کوئی دھماکہ خیز مواد برآمد نہیں ہوا ہے ۔
حکام نے کہا کہ مسافروں اور عملے کی حفاظت کو یقینی بنانے کے لئے تمام ضروری احتیاطی تدابیر پر من وعن عملدرآمد کو یقینی بنایا گیا۔انہوں نے کہاکہ بعد ازاں سرینگر ہوائی اڈے پر پروازیں شیڈول کے مطابق دوبارہ شروع ہو گئیں۔
دھمکی کال کے حقائق جاننے کی خاطر بڑے پیمانے پر تحقیقات شروع کی گئی ہے ۔