راجوری اور کٹھوعہ کے جنگلات میں آتشزدگی

جموں//
جموںکشمیر کے راجوری اور کٹھوعہ کے جنگلی علاقوں میں لگی آگ کے باعث سرسبز سونے کو ناقابل تلافی نقصان پہنچا ہے ۔
اطلاعات کے مطابق کٹھوعہ کے بسولی میں منگل کی صبح جنگلی علاقے سے آگ نمودار ہوئی جس نے آنافاناً ایک وسیع علاقے کو لپیٹ میں لے لیا۔
معلوم ہوا ہے کہ محکمہ جنگلی حیات اور فائر اینڈ ایمرجنسی محکمہ کے اہلکار جائے موقع پر پہنچے اور آگ بجھانے کی کارروائی شروع کی ۔
حکام نے بتایا کہ کئی گھنٹوں کی انتھک محنت کے بعد آگ پر قابو پایا گیا۔
دریں اثنا راجوری کے سیوانی اور ساسلکوٹ میں بھی جنگلی علاقے آگ کی لپیٹ میں آچکے ہے ۔
ذرائع نے بتایا کہ گرم ہوائیں چلنے سے جنگلی علاقے آگ کی زد میں آرہے ہیں جس وجہ سے سرسبز سونے کو نقصان پہنچ رہا ہے ۔
سرکاری ذرائع نے بتایا کہ راجوری کے جنگلی علاقوں میں پھیلی آگ پر قابو پانے کی خاطر عملہ اور مشینری کو کام پر لگا دیا گیا ہے ۔انہوں نے مزید بتایا کہ راجوری میں پچھلے تین دنوں سے جنگلی علاقوں میں آگ نمودار ہو رہی ہے اور اس کو بجھانے کی خاطر بڑے پیمانے پر آپریشن شروع کیا گیا ہے ۔
ان کے مطابق درجہ حرارت میں غیر معمولی اضافہ ہونے کی وجہ سے جنگلی علاقوں میں آگ نمودار ہو رہی ہے اور یومیہ۱۰سے۱۲آگ کی وارداتیں رونما ہو رہی ہیں۔