نہیں صاحب ہم کوئی نجومی نہیں ہیں اور بالکل بھی نہیں ہیں… ہم الیکشن کے ماہر بھی نہیں ہیں جو یہ قیاس کریں کہ لوک سبھا الیکشن میں کون جیتے گا اور کون ہارے گا…بی جے پی ۴۰۰ پار ہو جائیگی یا پھر انڈیا بلاک شرم سار ہو جائیگا… ہم کچھ بھی نہیں جانتے ہیں … سوائے اس ایک بات کے کہ… کہ جو کچھ بھی ان انتخابا ت میں ہوا… ۴ جون کو وہ دودھ کا دودھ اور پانی کا پانی ہو جائیگا… اب دودھ کس کے حصے میں آئیگا اور پانی پر ہی کسے اکتفا کرنا پڑے گا یہ بھی ۴ جون کو معلوم ہو ی جائیگا … لیکن… لیکن صاحب اس خیال کا کیا کیجئے گا جو کہیں سے بھی اور کبھی بھی آ ہی جاتا ہے… جیسے یہ خیال کہ اگر میڈم جی… میڈم محبوبہ جی الیکشن… جنوبی کشمیر کی لوک سبھا سیٹ جیت جائیں گی تو… تو کیا ہو گا… وہ کیا ہے کہ اگر آپ یہ سوچ رہے ہیں کہ وسطی اور شمالی کشمیر کی طرح جنوبی کشمیر کی سیٹ بھی آرام سے نیشنل کانفرنس کی جھولی میں جانے والی ہے تو… تو صاحب آپ اپنی سوچ کو درست کیجئے کہ… کہ ایسا کچھ ہونے والا نہیں ہے… اپنے گورے گورے بانکے چھورے‘عمرعبداللہ کچھ بھی کہیں لیکن…لیکن صاحب جنوبی کشمیر کی لوک سبھا نشست پر این سی اور پی ڈی پی میں کانٹے کی ٹکر ہے…وہ اپنے بخاری صاحب… الطاف بخاری صاحب کے امیدوار کی ضمانت ضبط تو نہیں ہو گی… لیکن … لیکن ان کا تیسرے نمبر پر آنا طے ہے… لیکن… لیکن صاحب ہم یہاں ان کی بات کرنے نہیں جا رہے ہیں کہ … کہ ہم میڈم جی کی بات کرنا چاہتے ہیں کہ… کہ اگر انہوں نے اس حلقے سے کامیابی حاصل کی تو… تو اس کے کیا معنی ہیں… کہ… کہ یہ الیکشن اگر کسی کیلئے امتحان ہے … یا سب سے بڑا امتحان ہے تو… تو وہ میڈم جی کا ہے … اور اس لئے ہے کہ بی جے پی کے ساتھ ان کا اتحاد لوگ اب بھی نہیں بھولے ہیں اور… اور پھر اسی بی جے پی کی مرکزی حکومت میں پی ڈی پی سے لیڈروں … بڑے چھوٹے لیڈروں کا جو انخلاء ہوا … وہ میڈم جی نہیں بھولی ہوں گی… بالکل اسی طرح جس طرح انہیں اپنے عمر صاحب کی یہ بات نہیں بھولی ہوں گی کہ گزشتہ لوک سبھا الیکشن میں نیشنل کانفرنس نے تین کی تین نشستیں جیت لی تھیں … اس لئے پی ڈی پی کیلئے وہ کوئی سیٹ نہیں چھوڑیں گے اور… اور بالکل بھی نہیں چھوڑیں گے … ہمیں میڈم جی کی جماعت سے کوئی خاص لگاؤ ہے اور نہ… اور نہ این سی سے بیر لیکن… لیکن اگر … جی ہاں اگر جنوبی کشمیر کی سیٹ پر میڈم جی کامیاب ہو جاتی ہیں تو… تو قسم اللہ میاں کی مزہ آجائیگا اور… اور اس لئے آجائیگا کہ … کہ کہنے والوں کاکہنا ہے کہ…کہ کشمیر میں اب الیکشن… اسمبلی الیکشن دور نہیں ہیں۔ ہے نا؟