کولگام اور سونمرگ حادثوں میں۵ سیاحوں کی موت‘تین زخمی

سرینگر//
جنوبی ضلع کولگام کے نی پورہ میں ہفتے کی سہ پہر ٹریفک کے ایک دلدوز حادثے میں پنجاب سے تعلق رکھنے والے چار سیاح ہلاک جبکہ تین دیگر زخمی ہوئے ۔
اطلاعات کے مطابق ہفتے کی سہ پہر نی پورہ کولگام میں اس وقت سنسنی کا ماحول پھیل گیا جب سیاحوں کی ایک گاڑی کو حادثہ پیش آیا۔
معلوم ہوا ہے کہ آس پاس موجود لوگ فوری طور پر جائے موقع پر پہنچے اور حادثے میں زخمی ہوئے سات سیاحوں کو گورنمنٹ میڈیکل کالج اننت ناگ منتقل کیا تاہم وہاں پر تعینات ڈاکٹروں نے چار سیاحوں کو مردہ قرار دیا۔
ہلاک شدگان کی شناخت سندیپ شرما، رومی ، جگدیش سنگھ اور گرمیت سنگھ کے بطور کی گئی جبکہ زخمیوں کی پہچان ہر چند سنگھ ، آشو اور کرنپال کے بطور ہوئی ہے ۔
ہسپتال ذرائع نے بتایا کہ زخمی تین سیاحوں میں سے بھی دو کی حالت انتہائی نازک بنی ہوئی ہے ۔
دریں اثنا پولیس نے اس ضمن میں کیس درج کرکے مزید تحقیقات شروع کی ہے ۔
ادھرسیاحتی مقام سونہ مرگ میں برف کے گڑھے میں گرنے سے سیاح ہلاک جبکہ اس کا ساتھی زخمی ہوا ہے ۔
اطلاعات کے مطابق ہفتے کے روز سونہ مرگ میں تھجواس گلیشئر کی سیر وتفریح پر دوسیاح گئے اس دوران حادثاتی طور پر دونوں برف کے گڑھے میں جاگرے ۔
معلوم ہوا ہے کہ پولیس نے فوری طورپر ریسکیو آپریشن شروع کیا جس دوران دونوں کو برف کے گڑھے سے باہر نکال کر ہسپتال لے جایا گیا تاہم ڈاکٹروں نے دیپک پرلاد پٹیل ساکن مہاراشٹریہ کو مردہ قرار دیا۔
معلوم ہوا ہے کہ حادثے میں زخمی ہوئے دوسرے سیاح کی حالت خطرے سے باہر ہے ۔