پاکستان کے زیر قبضہ کشمیر کو کسی بھی قیمت پر حاصل کریں گے :شاہ

آراہ//
مرکزی وزیر داخلہ‘ امیت شاہ نے جمعہ کے روز کہا کہ پاکستان کے زیر قبضہ کشمیر کو کسی بھی قیمت پر حاصل کیا جائے گا
شاہ نے اعلان کیا کہ وزیر اعظم نریندر مودی نے لوک سبھا انتخابات کے پانچویں مرحلے تک پہلے ہی ۳۱۰نشستیں حاصل کرلی ہیں۔
شاہ نے جمعہ کو بہار کے آرا ہ میں ایک عوامی ریلی کے دوران اعلان کیاکہ لوک سبھا انتخابات کے پانچویں مرحلے تک مودی جی پہلے ہی۳۱۰ سیٹیں جیت چکے ہیں۔ لالو اور راہل کا مکمل صفایا ہو چکا ہے۔ بہار میں مغرور اتحاد اس بار اپنا کھاتہ بھی نہیں کھول پائے گا ۔
شاہ نے کانگریس اور اس کے اتحادیوں کو تنقید کا نشانہ بناتے ہوئے کہا کہ وہ پاکستان کی دھمکیاں دے کر شہریوں کو ڈرانے کی کوشش کر رہے ہیں اور کہا کہ بی جے پی کسی بھی چیز سے نہیں ڈرتی ہے۔
پی او جے کے کے بارے میں بات کرتے ہوئے شاہ نے کہا کہ ہم اسے کسی بھی قیمت پر واپس حاصل کریں گے۔
شاہ نے کہا’’یہ کانگریسی رہنما لالو جی، یہ مغرور اتحاد ہمیں یہ کہہ کر ڈرانے کی کوشش کرتا ہے کہ پاکستان کے پاس ایٹم بم ہے اور وہ پی او کے (پاکستان کے زیر انتظام جموں و کشمیر) کے بارے میں بات نہیں کرتے۔ میں لالو یادو اور ان کی کمپنی کو بتانے آیا ہوں کہ ہم بی جے پی والے پاکستان کے ایٹم بم سے نہیں ڈرتے‘‘۔
وفاقی وزیر داخلہ نے کہا’’پی او کے (پاکستان کا زیر قبضہ جموں و کشمیر) ہمارا ہے، اور ہم اسے لے لیں گے۔ یہ بی جے پی کا عزم ہے‘‘۔
دفعہ۳۷۰کی منسوخی پر روشنی ڈالتے ہوئے شاہ نے خطے میں دہشت گردی کے خاتمے کا سہرا وزیر اعظم نریندر مودی کو دیا۔
شاہ نے کہا’’برسوں تک اس کانگریس پارٹی نے آرٹیکل۳۷۰کو ایک بچے کی طرح پالا۔ ۵؍ اگست۲۰۱۹ کو وزیر اعظم مودی نے آرٹیکل ۳۷۰ کو ختم کردیا اور اس ملک سے دہشت گردی کے نشان کو ہمیشہ کے لئے مٹا دیا‘‘۔
رام مندر کے معاملے پر خطاب کرتے ہوئے شاہ نے کانگریس اور لالو پرساد یادو پر دہائیوں سے اس کی تعمیر میں رکاوٹ ڈالنے کا الزام لگایا۔
وزیر داخلہ کاکہنا تھا’’اس کانگریس پارٹی اور لالو جی نے ۷۰ سال تک رام مندر کو روکا۔ آپ نے مودی جی کو دوسری بار وزیر اعظم بنایا اور صرف پانچ سال میں مودی جی نے مقدمہ جیت لیا، سنگ بنیاد رکھا اور جنوری میں انہوں نے پران پرتیشتھا کی تقریب کامیابی سے کی۔‘‘