الور میں جنگل گئے ایک شخص کی لاش برآمد

الور،// راجستھان میں الور ضلع کے بانسور علاقے کے بہرام کا باس میں دو دن پہلے اپنے جانوروں کی تلاش میں گھر سے باہر نکلے ایک شخص کی لاش جمعرات کو جنگل کے راستے پر مسخ شدہ حالت میں ملی۔
موصولہ اطلاع کے مطابق بہرام کا باس کا رہنے والا ہنومان یادو (55) دو دن قبل جانوروں کی تلاش میں جنگل گیا تھا۔ اس دوران لیکڑی کے نزدیک جوہڑ جنگل میں جنگلی جانوروں نے اسے مبینہ طور پر اپنا شکار بنا لیا۔
بیٹے روشن یادو نے بتایا ”ہمارے دو جانور تین چار دن پہلے کھو گئے تھے ۔ ان کی تلاش کے دوران والد 21 مئی کو لیکڑی جنگل چلے گئے لیکن دو دن تک ان کے بارے میں کوئی خبر نہیں ملی۔ آج صبح جب ہم جنگل میں تلاش کے لیے گئے تو ہمیں اپنے والد کی لاش جنگل کے راستے پر پڑی ہوئی ملی۔ اس کی اطلاع ملتے ہی محکمہ جنگلات کی ٹیم اور پولیس موقع پر پہنچی اور واقعہ کی معلومات حاصل کی۔
فاریسٹ آفیسر دلیپ کمار نے کہا، ‘‘ہم آج صبح اطلاع ملنے پر موقع پر پہنچے اور واقعہ کے بارے میں معلومات یکجا کیں۔ جنگلی جانوروں کے حملے سے موت کی تصدیق میڈیکل رپورٹ پر ہی ہو گی۔ اگر موت کی تصدیق جنگلی جانوروں کے حملے سے ہوتی ہے تو محکمہ کی طرف سے 5 لاکھ روپے تک کی ایکس گریشیا رقم دی جائے گی۔ واقعہ کی اطلاع اعلیٰ حکام کو دے دی گئی ہے ۔