’جنوبی کشمیر میں بھی اچھے ووٹر ٹرن آؤٹ کی امید ہے‘

سرینگر//
ڈیموکریٹک پروگرسیو آزاد پارٹی (ڈی پی اے پی) کے چیئر مین غلام نبی آزاد نے جنوبی کشمیر میں بھی بارہمولہ لوک سبھا جیسے اچھے ووٹر ٹرن آؤٹ کی امید ظاہر کی ہے ۔
آزاد نے کہا کہ کم ووٹنگ شرح سے نہ امید وار خوش ہوتا ہے اور نہ ہی لوگوں کو تسلی ہوتی ہے ۔
ڈی پی اے پی کے چیئرمین نے ان باتوں کا اظہار منگل کو نامہ نگاروں کے ساتھ بات کرنے کے دوران کیا۔
آزاد نے کہا’’میں نے پہلے ہی کہا تھا کہ شمالی کشمیر میں ووٹنگ کی شرح۶۰سے۷۰فیصد ہوگی اور میں امید کرتا ہوں کہ جنوبی کشمیر میں بھی۷۰سے۸۰فیصد پولنگ ریکارڈ ہوگی‘‘۔
ڈی پی اے پی کے چیئرمین کا کہنا تھا کہ اچھی ووٹنگ شرح سے جیتنے والا امید وار بھی خوش ہوتا ہے اور لوگوں کو بھی تسلی ہوتی ہے ۔
آزاد نے کہا کہ ووٹنگ کی کم شرح سے امید وار خوش ہوتا ہے نہ ہی لوگوں کو تسلی ہوتی ہے بلکہ لوگ کچھ مانگ بھی نہیں سکتے ہیں۔انہوں نے کہا کہ جیتنے والے امید وار کو بھی چاہئے کہ وہ اپنے فرض کو نبھائے ۔
قابل ذکر ہے کہ شمالی کشمیر کی پارلیمانی نشست پر۲۰مئی کو ہونے والی پولنگ میں۵۹فیصد ووٹنگ ریکارڈ ہوئی ہے جو انتخابی تاریخ میں۱۹۶۷کے بعد سے سب سے زیادہ ہے ۔
جنوبی کشمیر کی لوک سبھا سیٹ کیلئے۲۵مئی کو پولنگ ہوگی۔