سرینگر لوک سبھا سیٹ کی پولنگ کیلئے انتظامات مکمل

سرینگر//
سرینگر پارلیمانی حلقے کے ریٹرننگ آفیسر(آر او) ڈاکٹر بلال محی الدین بٹ کا کہنا ہے کہ سرینگر لوک سبھی سیٹ کیلئے۱۳مئی کو ہونے والی پولنگ کیلئے تمام تر انتظامات کو حتمی شکل دی گئی ہے ۔انہوں نے لوگوں خاص کر نوجوانوں کو ووٹ ڈالنے کی اپیل کی۔
آر او نے ان باتوں کا اظہار پیر کے روز یہاں ووٹر جانکاری پروگرام کے حاشیہ پر نامہ نگاروں کے ساتھ بات کرنے کے دوران کیا۔
ڈاکٹر بٹ نے کہا’’سرینگر لوک سبھا سیٹ کیلئے ۱۳مئی کو ووٹ ڈالنے ہیں میری لوگوں خاص کر نوجوان ووٹروں سے اپیل ہے کہ وہ ووٹ ڈالیں تاکہ جمہوریت کو مضبوط کیا جا‘‘’۔
آر او کا کہنا تھا’’۱۸حلقوں پر مشتمل سرینگر لوک سبھا سیٹ کیلئے۲۲۹پولنگ مراکز قائم کئے گئے ہیں‘‘۔انہوں نے کہا کہ میری لوگوں سے اپیل ہے کہ وہ۱۳مئی کو نکل کر اپنے اپنے پولنگ مراکز میں اپنے پسندیدہ امید واروں کو ووٹ ڈالیں۔
ڈاکٹر بٹ نے کہا کہ پولنگ کے لئے تمام تر سیکورٹی اور پولنگ مراکز پر تمام سہولیات کو حتمی شکل دی گئی ہے ۔انہوں نے کہا کہ ہوم پولنگ ۷‘۸ اور۹مئی کو ہوگی اور اس سلسلے جن۸۵برس سے زیادہ ووٹروں اور۴۰فیصد جسمانی طور معذور ووٹروں نے منظوری دی ہے وہ گھر سے ہی ووٹ ڈالیں گے ۔
آر او کا کہنا تھا کہ ہوم ووٹرس کی تعداد قریب ڈھائی سو ہے ۔انہوں نے خواتین سے بھی ووٹ ڈالنے کی اپیل کی ہے ۔