جموں/۶ مئی
جموں کشمیر کے ضلع پونچھ میں 4 مئی کو ہندوستانی فضائیہ کی گاڑیوں پر حملے کے ذمہ دار دو دہشت گردوں کے خاکے جاری کئے گئے ہیں۔
4 مئی کو پونچھ کے سورن کوٹ کے بکربل (ثنائی) علاقے میں دہشت گردوں نے ہندوستانی فضائیہ کی دو گاڑیوں پر حملہ کیا تھا جس میں ایک فضائیہ کا ایک اہلکار ہلاک اور چار دیگر زخمی ہوگئے تھے۔
عہدیداروں نے کہا”پولیس نے اب تک پوچھ تاچھ کے لئے تقریبا 20 لوگوں کو حراست میں لیا ہے۔ پونچھ کے ڈانا ٹاپ، شاہ اسٹار، شیندرا اور ثنائی ٹاپ علاقوں میں بڑے پیمانے پر محاصرے اور تلاشی کی کارروائی جاری ہے۔ فوج اور پولیس کے سینئر افسران بشمول جی او سی 16 کور اور اے ڈی جی پی جموں نے کل جائے وقوعہ کا دورہ کیا اور سیکورٹی انتظامات کا جائزہ لیا“۔
عہدیداروں نے کہا”خیال کیا جاتا ہے کہ دو سے تین دہشت گردوں کے ایک گروپ نے سنیچر کو سورن کوٹ علاقے میں ہندوستانی فضائیہ کے قافلے پر حملہ کیا تھا۔ جو کوئی بھی ان دہشت گردوں کے ٹھکانوں کے بارے میں نتیجہ خیز اور قابل اعتماد معلومات فراہم کرے گا جس سے ان کی گرفتاری ہوگی انہیں انعام دیا جائے گا اور ان کی شناخت خفیہ رکھی جائے گی“۔
عہدیداروں نے چار موبائل نمبر بھی فراہم کیے ہیں جن پر لوگ رابطہ کرسکتے ہیں اور معلومات کا اشتراک کرسکتے ہیں۔ یہ نمبر 9541051982، 8082294375، 9541051982 اور 8082294375 ہے۔ (ایجنسیاں)