لوک سبھا الیکشن این سی اورپی ڈی پی میں لڑائی نہیں ہے:محبوبہ

سرینگر//
پی ڈی پی صدر اور سابق وزیر اعلیٰ محبوبہ مفتی کا کہنا ہے کہ لوک سبھا الیکشن جموں و کشمیر کی آواز کو نئی دلی تک پہنچانے کی لڑائی ہے ۔انہوں نے کہا کہ یہ انتخابات نیشنل کانفرنس اور پی ڈی پی کے درمیان لڑائی نہیں ہے ۔
پی ڈی پی صدر نے ان باتوں کا اظہار پیر کے روز جنوبی کشمیر کے ضلع اننت ناگ میں ایک انتخابی ریلی کے حاشیہ پر نامہ نگاروں کے ساتھ بات کرنے کے دوران کیا۔
محبوبہ نے کہا’’یہ الیکشن عمر صاحب اور میرے درمیان لڑائی نہیں ہے بلکہ جموں وکشمیر کے لوگوں کی آواز کو نئی دہلی تک پہنچانے کی لڑائی ہے‘‘۔ان کا کہنا تھا کہ اس الیکشن کے دوران لوگ صحیح فیصلہ کریں گے ۔
ایک سوال کے جواب میں سابق وزیر اعلیٰ نے کہا’’مجھے پیر پنچال سے اطلاعات موصول ہو رہی ہیں کہ وہاں کے لوگ یہ بات سمجھتے ہیں کہ انہیں ایک ایسی آواز کی ضرورت ہے جو دلی میں بر سر اقتدار طاقتوں کے خلاف کھڑی ہو‘‘۔انہوں نے کہا’’میں گذشتہ۵برسوں سے لوگوں کی بات کرتی ہوں ہم سے دفعہ ۳۷۰چھین لیا گیا یہ فیصلہ جموں وکشمیر کے لوگوں کو قابل قبول نہیں ہے ، ہم اس فیصلے کے خلاف کھڑا ہوں گے ‘‘۔
محبوبہ کا کہنا تھا کہ پتھر اور بندوق سے لوگوں کو کوئی فائدہ نہیں پہنچا ہے لوگوں نے جب سال۲۰۰۲میں مرحوم مفتی محمد سعید صاحب کو ووٹ دئے تو انہوں نے ٹاسک فورس کو ختم کیا، پوٹا کو ہٹایا ور بات چیت کا سلسلہ شروع کرایا۔محبوبہ مفتی نے لوگوں سے اپیل کی کہ وہ۷مئی کو نکل کر اپنے ووٹ کا استعمال کریں۔