شمالی کشمیر کی بارہ مولہ نشست پر سجاد لون کی مکمل حمایت کریں گے: بخاری

سرینگر//
جموں وکشمیر اپنی پارٹی نے شمالی کشمیر کی بارہمولہ لوک سبھا سیٹ پر پیپلز کانفرنس کے صدر اور امیدوار سجاد غنی لون کو مکمل حمایت کرنے کا اعلان کیا ہے ۔
نیشنل کانفرنس اور پی ڈی پی کا نام لئے بغیر الطاف بخاری نے کہاکہ روایتی سیاستدانوں کو اب سیاست سے کنارہ کشی اختیار کرنی چاہئے ۔
اپنی پارٹی کے سربراہ نے مزید کہاکہ ہمارا مقدر ہندوستان کے ساتھ لکھا گیا ہے ۔
ان باتوں کا اظہاربخاری نے سرینگر میں ایک پریس کانفرنس کے دوران کیا۔انہوں نے کہاکہ اپنی پارٹی کا قیام۵؍اگست ۲۰۱۹کے بعد عمل میں آیا تاکہ لوگوں کے جائز مسائل کو حل کرنے کی راہ ہموارہو سکے ۔
بخاری نے کہاکہ اپنی پارٹی نے ہی زمینوں کا تحفظ اور مقامی نوجوانوں کو ہی نوکریاں دینے کے حوالے سے آواز بلند کی اور وزیر اعظم مودی اور وزیر داخلہ کے ساتھ معاملہ اٹھایا اور بعدازاں مرکزی حکومت نے اس ضمن میں ایک نوٹیفکیشن جاری کی۔ان کے مطابق اپنی پارٹی نے ہی نوکریاں اور زمینوں کو تحفظ فراہم کرنے کی خاطر جدوجہد کی ۔
بخاری کا مزید کہنا تھاکہ ہم اقتدار کے بھوکے نہیں ،روایتی سیاستدانوں نے پانچ برسوں کے دوران منفی رول ادا کیا اور یہاں کے عوام انہیں کھبی معاف نہیں کریں گے ۔
اپنی پارٹی کے صدر نے مزید بتایا کہ پانچ اگست ۲۰۱۹کو دفعہ ۳۷۰ منسوخی کے بعد کشمیر کے پانچ ممبران پارلیمان کو استعفیٰ دینا چاہئے تھا لیکن انہوں نے ایسا نہیں کیا۔
شمالی کشمیر کی بارہ مولہ نشست پر سجاد لون کی جماعت پیپلز کانفرنس کو حمایت دینے کا اعلان کرتے ہوئے الطاف بخاری نے کہاکہ اپنی پارٹی سجاد لون کی بھر پور حمایت کرئے گی ۔
بخاری نے کہا‘‘دیگر سیٹوں پر بھی پیپلز کانفرنس اور اپنی پارٹی ساتھ ساتھ ہیں‘‘۔ان کے مطابق ہمارا مشن سٹیٹ ہڈ کی بحالی اور دیگر اہم مسائل کو حل کرنا ہے جس کے لئے ہم اپنی جدوجہد جاری رکھیں گے ۔
اپنی پارٹی کے سربراہ نے روایتی سیاستدانوں کو ریٹائر ہونے کا مشورہ دیتے ہوئے کہاکہ لوگوں کو گمراہ کرنے والوں کے لئے اب کوئی جگہ نہیں ۔
بخاری نے مزید کہاکہ ہمارا مقدر ہندوستان کے ساتھ سال۱۹۴۷میں لکھا گیا ہے ۔اپنی پارٹی کے سربراہ نے کہاکہ زخم بھی دہلی نے دئے اور مرہم بھی ان ہی کو کرنا ہے ۔
اپنی پارٹی کے صدرنے امید ظاہر کی کہ پارلیمانی چناؤ کے دوران لوگ اپنی پارٹی کے امیدواروں کے حق میں اپنی حق رائے دہی کا استعمال کریں گے ۔انہوں نے کہاکہ ابھی بھی جیلوں میں کشمیر کے نوجوان مقید ہیں جنہیں رہا کروانا اولین ترجیحات میں شامل ہیں۔