نئی دہلی//ہندوستانی مارکسی کمیونسٹ پارٹی (سی پی آئی-ایم) نے وزیر اعظم نریندر مودی کے خلاف لوک سبھا انتخابی مہم کے دوران اشتعال انگیز تقریر کرنے کا الزام لگایا ہے اور الیکشن کمیشن سے ان کے اور بھارتیہ جنتا پارٹی (بی جے پی) کے خلاف کارروائی کرنے کا مطالبہ کیا ہے ۔
سی پی آئی (ایم) کے جنرل سکریٹری سیتارام یچوری نے پیر کو الیکشن کمیشن کو لکھے ایک خط میں میڈیا میں شائع مسٹر مودی کی تقاریر کے اقتباسات شیئر کیے اور ان کے خلاف ایف آئی آر درج کرنے کا مطالبہ کیا۔
خط میں ان رپورٹوں کا حوالہ دیتے ہوئے مسٹر یچوری نے کہا ہے کہ مسٹر مودی نے 21 اپریل کو راجستھان کے بانسواڑہ میں ایک جلسہ عام سے خطاب کرتے ہوئے مبینہ طور پر مسلم کمیونٹی کی طرف اشارہ کرتے ہوئے لوگوں سے پوچھا کہ کیا آپ کی سخت محنت کی کمائی زیادہ بشے والوں اور دراندازوں کو دی جانی چاہئے ؟ مسٹر یچوری نے کہا کہ اس تقریر کو اخبارات کے علاوہ مین اسٹریم میڈیا اور سوشل میڈیا میں بڑے پیمانے پر رپورٹ کیا گیا ہے ۔
خط میں کہا گیا ہے کہ کسی مخصوص کمیونٹی کو نشانہ بنانا عوامی نمائندہ ایکٹ اور ماڈل کوڈ آف کنڈکٹ کی دفعہ 123 (3) کی مکمل خلاف ورزی ہے ۔مسٹر یچوری نے کہا ہے کہ وہ پہلے ہی کمیشن سے اس طرح کے معاملات کی شکایت کر چکے ہیں لیکن کمیشن کی طرف سے اس سلسلے میں کوئی جواب نہیں آیا ہے ۔
مسٹر یچوری نے کہا ہے ‘‘ہم الیکشن کمیشن سے اپیل کریں گے کہ وہ اس تازہ شکایت کا بھی نوٹس لے اور مسٹر نریندر مودی اور بھارتیہ جنتا پارٹی کے خلاف فوری کارروائی کرے ۔ اس کے خلاف فرقہ وارانہ جذبات بھڑکانے اور نفرت پھیلانے کے الزام میں بھی ایف آئی آر درج کی جائے ۔ "عوامی مباحثوں اور بحث کو مزید بڑھنے سے روکنے کے لیے فوری کارروائی کی ضرورت ہے ۔”