ای ڈی انسولین فراہم کرنے کے سلسلے میں عدالت کو گمراہ کر رہی ہے : آپ

نئی دہلی// عام آدمی پارٹی (آپ) نے کہا کہ وزیراعلی اروند کیجریوال کو انسولین نہ ملے اس لئے تفتیشی ایجنسی انفورسمنٹ ڈائریکٹوریٹ (ای ڈی) اور تہاڑ انتظامیہ عدالت کو گمراہ کررہے ہیں۔
آپ کی سینئر لیڈر اور دہلی کے کابینہ وزیر آتشی نے پیر کو کہا کہ ای ڈی اور تہاڑ انتظامیہ مسٹر کیجریوال کو انسولین نہ پہنچا کر عدالت کو گمراہ کر رہے ہیں۔ انہوں نے کہا کہ بی جے پی کی ای ڈی اور جیل انتظامیہ کا عدالت کو یہ بتانا کہ انہوں نے مسٹر کیجریوال کو ایمس کے ڈاکٹر کو دکھایا ہے ، سراسر جھوٹ ہے ۔ مسٹر کیجریوال کو ایمس میں ذیابیطس کے کسی ماہر ڈاکٹر کو اس وقت تک نہیں دکھایا گیا جب تک کہ مسٹر کیجریوال کو ای ڈی اور تہاڑ انتظامیہ نے عدالت میں پیش نہیں کیا۔
محترمہ آتشی نے کہا کہ 30 سال سے شدید ذیابیطس میں مبتلا مریض کی انسولین کو روکنے کے لیے ایمس کا ایک سادہ ڈائٹ چارٹ عدالت میں استعمال کیا گیا تھا۔ انہوں نے کہا کہ ای ڈی اور تہاڑ انتظامیہ پورے ملک کو گمراہ کرنے کی کوشش کر رہی ہے ۔ یہ تمام سازش اس لیے رچی جا رہی ہے کہ مسٹر کیجریوال اپنے ڈاکٹر سے بات ن کرسکیں اور انسولین نہ لے سکیں ۔
انہوں نے کہا کہ ای ڈی اور تہاڑ انتظامیہ کی طرف سے عدالت میں کہا گیا کہ انہوں نے ایمس کے ڈاکٹروں سے رابطہ قائم کیا، لیکن حقیقت یہ ہے کہ انہوں نے ایمس کے کسی ڈاکٹر سے رابطہ نہیں کیا۔ دنیا میں کوئی ڈاکٹر ایسا نہیں ہوگا جو یہ کہے کہ ایک بار بلڈ شوگر 300 سے تجاوز کر جائے تو اسے انسولین کے بغیر کنٹرول کیا جا سکتا ہے ۔ انہوں نے کہا کہ عدالت کو گمراہ کرنے کی کوشش کی جارہی ہے ، انہوں نے کہا کہ ایمس کے ڈاکٹروں کا حوالہ دیکر بی جے پی کہتی ہے کہ مسٹر کیجریوال کو انسولین کی ضرورت نہیں ہے ۔