چلئے صاحب آج لوک سبھا الیکشن کے پہلے مرحلے میں ووٹ ڈالے جا رہے ہیں…اپنے جموں کشمیر میں بھی ڈالے جارہے ہیں… ادھمپور حلقے میں ڈالے جا رہے ہیں جہاں سے مرکزی وزیر ڈاکٹر جتندر سنگھ مسلسل تیسری بار منتخب ہونے کا خیال دل میں پال رہے ہیں اور… اور کیا پتہ کہ ان کا یہ خیال … حقیقت میں بدل جائے اور… اور اس لئے بدل جائے کہ… کہ جہاں دوسری ریاستوں میں بی جے پی گھر بیٹھے الیکشن جیتنے کا خواب دیکھ رہی ہے وہاں اگرڈاکٹر جتندر بھی اس خواب سے مستفید ہونے کا سوچ رہے ہوں تو… تو اس میں حرج ہی کیا ہے… کہ… کہ ویسے بھی ڈاکٹر جتندر اگراُس سب میں یقین رکھتے ہیں… سچے دل سے یقین رکھتے ہیں جو کچھ بھی انہوں نے دفعہ ۳۷۰ کی منسوخی کے بعد کہا تھا اور… اور پھر کہتے ہی چلے گئے … اگر واقعی میں یہ جناب اس میں یقین رکھتے ہیں تو… تو ادھمپور حلقے سے ان کی ہیٹ ٹرک یقینی ہے اور… اور سو فیصد ہے…ارے ہم بھول گئے تھے… یہ بھول گئے تھے کہ ڈاکٹر جتندر نے کیا کہا تھا… ان جناب نے دفعہ ۳۷۰ کی منسوخی کے بعد کہا تھا کہ اس دفعہ کی منسوخی کی خوشی میں کشمیر میں… جی ہاں انہوں نے کہا تھا کہ کشمیر میں لوگ اتنے خوش ہیں کہ وہ… وہ خوشی کے مارے سڑکوں پر نکل کر ناچ رہے ہیں ‘ گا رہے ہیں… اگر واقعی ڈاکٹر جتندر نے سچ کہا تھا تو…تو آپ ہی بتائیے کہ… کہ ان کی جیت کی ہیٹ ٹرک میں کیا کوئی حائل ہو سکتا ہے کہ… کہ دفعہ ۳۷۰ کی منسوخی سے اگر کشمیر خوشی کے مارے سڑکوں پر ناچ رہا تھا تو… تو پھر جموں صوبے کا خدا ہی حافظ تھا ۔ خیر !جموں کشمیر میں اونٹ کس کروٹ بیٹھ جائے گا یہ تو ہم نہیں جانتے ہیں … اس کے باوجو د بھی نہیں جانتے ہیں کہ بی جے پی کشمیر کی تینوں نشستوں سے الیکشن نہیں لڑ رہی ہے… بلکہ اس کے ہم خیال لڑ رہے ہیں…لیکن ملک کے باقی حصوں میں’ اب کی بار بھی مودی سرکار ‘یقینی ہے اور… اور اپوزیشن کو بھی اس بات کا یقین ہے… لیکن… لیکن پھر بھی وہ میدان میں ہے… میدان میں ڈٹی ہو ئی ہے … جس کیلئے ووٹر… ملک کے ووٹر اپوزیشن کوووٹ کی صورت میں داد دے یا نہیں لیکن ہم ضرور دیں گے… ووٹ نہیں دیں گے‘داد دیں گے …اور آج پہلے مرحلے کے موقع پر دیں گے ۔ہے نا؟
پہلا مرحلہ…!
