گجرات سے بدلہ لینے کے ساتھ ہی لکھنؤ نے جیت کی ہیٹ ٹرک بنائی

لکھنؤ// گجرات ٹائٹنز کو کھیل کے ہر شعبے میں پست ثابت کرتے ہوئے لکھنؤ سپر جائنٹس (ایل ایس جی) نے اتوار کے روز انڈین پریمیئر لیگ میں جیت کی ہیٹ ٹرک مکمل کرکے پوائنٹس ٹیبل میں اپنی پوزیشن کو بہتر کیا اور آئی پی ایل) کے گزشتہ سیزن میں ملی شکست کا بدلہ بھی لے لیا۔
ایکنا اسٹیڈیم کی سست نظر آنے والی پچ پر مارکس اسٹونیس (58)، کے ایل راہل (33) اور نکولس پورن (ناٹ آؤٹ 32) کی شاندار اننگز کی مدد سے ایل ایس جی نے پانچ وکٹ پر 163 رنز کا نارمل اسکور بنایا۔ یش ٹھاکر (30 رن پر پانچ وکٹ) اور کرونل پانڈیا (11 رن پر تین وکٹ) کی مہلک بولنگ کے بعد گجرات کی اننگز 18.5 اوورز میں 130 رن پر سمٹ گئی اور 33 رن سے آسان فتح درج کرائی۔
آئی پی ایل میں یہ یش ٹھاکر کی بہترین کارکردگی ہے۔ گجرات نے 164 رن کے ہدف کا تعاقب کرتے ہوئے تیز شروعات کی تھی۔ کپتان شبھمن گل (19) اور سائی سدرشن (31) نے پہلے پاور پلے میں نو رن فی اوور کی اوسط سے رن بنائے لیکن یش نے اننگز کے چھٹے اوور کی آخری گیند پر گیل کو آؤٹ کر دیا۔ کین ولیمسن (1) بھی اپنا اثر نہ چھوڑ سکے جب روی وشنوئی نے انہیں اپنی ہی گیند پر کیچ کر لیا۔
جیسے ہی گجرات کی وکٹ گرنا شروع ہوئی، رن کی رفتار سست ہوگئی اور صرف وجے شنکر (17) اور راہل تیوتیا (30) ہی لکھنؤ کے بولنگ اٹیک کا کسی حد تک سامنا کر سکے۔
اس سے قبل کپتان کے ایل راہل کا پہلے بلے بازی کرنے کا فیصلہ درست معلوم نہیں ہوا جب گجرات کے تیز گیند باز امیش یادو نے اپنے پہلے ہی اوور میں فارم میں موجود بلے باز کوئنٹن ڈی کاک (6) کو آؤٹ کر کے میزبان ٹیم کو زبردست جھٹکا دیا۔
اس بھنور سے نکلنے کی ذمہ داری کے ایل راہل اور مارکس اسٹونیس کی تھی جنہوں نے سنگلز، ڈبلز کی مدد سے اسکور بورڈ کو چلتا رکھا اور ڈھیلی گیندوں کو چوکوں اور چھکوں میں تبدیل کیا۔ رن ریٹ بڑھانے کی کوشش میں راہل لانگ آن پر کھڑے راہول تیوتیا کے ہاتھوں کیچ آؤٹ ہو گئے اور ٹیم کا اسکور تین وکٹ پر 91 رن تھا۔
مارکس اسٹوئنس نے بھی ہاتھ کھولے لیکن وہ بھی نالکنڈے کا دوسرا شکار بنے۔ انہوں نے نالکنڈے کے اوور کی پہلی گیند پر شاندار چھکا لگایا اور چوتھی گیند پر اس کوشش کو دہراتے ہوئے گراؤنڈ میں موجود 45 ہزار کے قریب شائقین کو محظوظ کیا لیکن اگلی ہی گیند پر وہ نوجوان بولر کے مزاج کو نہ پڑھ سکے۔اس کوشش میں وہ آسانی سے وکٹ کیپر کے ہاتھوں آؤٹ ہوگئے۔ اپنی نصف سنچری اننگز کے دوران انہوں نے 43 گیندیں کھیلیں اور چار چوکے اور دو چھکے لگائے۔
دوسری جانب نئے بلے باز نکولس پران نے اپنی عادت کے مطابق تیز رفتاری سے رنز بنانے کا سلسلہ جاری رکھا لیکن گجرات کے گیند بازوں نے انہیں زیادہ فرصت نہیں دی۔ پران نے آیوش بدونی (20) کے ساتھ صرف 20 گیندوں میں 31 رنز جوڑ کر ہدف کو مشکل بنانے میں کوئی کسر نہیں چھوڑی۔ بدونی راشد خان کا شکار بن گئے۔