تو کیا اپنے کشمیر سے افسپا کو ختم کیا جارہا ہے؟صاحب صحیح صحیح تو ہمیں بھی معلوم نہیں ہے لیکن کہنے والوں کاکہنا ہے کہ اپنے شاہ صاحب… امیت بھائی شاہ صاحب نے کہا ہے کہ کشمیر سے افسپا ختم کیا جائیگا اور … اور ہاں فوج بھی نکالی جائیگی … یہ ایسے دو مطالبات ہیں جن کو پورا کرنے کی ’کوشش‘ میںاپنے گورے گورے بانکے چھورے عمرعبداللہ کے سر سے بال بھی غائب ہو گئے … کسی زمانے میں عمر صاحب جب کشمیر کے مالک کل تھے تو… تو انہیں انہوں نے اپنی اسی حیثیت کا غلط اندازہ لگایا اور… اور کشمیر میں جزوی طور پر افسپا ختم کرنے کی بات ہے… وہ د ن اور آج کا دن کہ ان جناب کی قسمت ایسی نہیں رہی جیسی تھی… اب تو عمر صاحب افسپا کا نام بھی نہیں لے سکتے ہیں ‘اسے ہٹانے کی بات تو صاحب دور کی بات ہے… لیکن امیت بھائی شاہ صاحب کاکہنا ہے کہ کشمیر میں افسپا ہٹایا جائیگا …فوج کا انخلاء بھی ہو گا… ان کی یہ باتیں لتا منگیشکر کے کسی سریلی گیت جیسی سریلی لگ رہی ہیں… جو کانوں میں رس گھول رہی ہیں… لیکن صاحب کہنے اور ہونے میں فرق ہے… بہت فرق … اس کے باوجود بھی فرق ہے کہ یہ بات اپنے گورے گورے بانکے چھورے نہیں بلکہ بھارت دیش کے وزیر داخلہ فر مارہے ہیں… لیکن صاحب اس کے باوجود بھی ہم یہی کہیں گے کہ… کہ جب ایسا ہو گا تب دیکھا جائیگا کہ… کہ یہ الیکشن کا موسم ہے… الیکشن ہونے والے ہیں… اپنے کشمیر اور جموں میں بھی ہونے والے ہیں… کئی کئی برسوں کے بعد ہونے والے ہیں… اور الیکشن کے اس موسم میں سیاستدان کچھ بھی کہتے ہیں… ایسا کچھ بھی جس سے ان کے ووٹر خوش ہوں … جس سے یہ ووٹروں کا دل جیت سکیں … اگر امیت بھائی شاہ صاحب نے بھی افسپا کے بارے میں کچھ ایسا ویسا کہا تو… تو کوئی بڑی بات نہیں ہے کہ… کہ جہاں سیاستدان اس وقت آسمان سے چاند تارے توڑنے کی باتیں کرتے ہیں… شہد اور دودھ کی نہریں بہانے کے وعدے کرتے ہیں … دھرتی کو سورگ بنانے کی یقین دہانی کراتے ہیں… وہاں اگر امیت بھائی شاہ صاحب نے کشمیر جیسی ایک چھوٹی جگہ سے افسپا کو ہٹانے کی بات کہی تو… تو اللہ میاں کی قسم یہ کوئی بڑی بات نہیں ہے… بالکل بھی نہیں ہے کہ… کہ الیکشن جو ہونے والے ہیں ۔ ہے نا؟