لو ک سبھا انتخابات : پچھلے تمام ریکارڈ ٹوٹ جائیں گے: وزیر اعظم مودی

پٹھان متھیٹا(کیرالا)//
وزیر اعظم نریندر مودی نے جمعہ کو کہا کہ بی جے پی کی زیرقیادت این ڈی اے آئندہ لوک سبھا انتخابات میں پچھلے ریکارڈ کو توڑ کر مرکز میں اقتدار حاصل کرے گی۔
وزیر اعظم نے کہا’’ ہم جلد ہی جمہوریت کا ایک عظیم تہوار دیکھنے جا رہے ہیں۔ مجھے پختہ یقین ہے کہ اس بار کیرالہ کی بی جے پی کیلئے محبت ایک بہت بڑی حمایت میں بدل جائے گی۔ مجھے پختہ یقین ہے کہ اس بار پچھلے تمام ریکارڈ ٹوٹ جائیں گے۔ مجھے پختہ یقین ہے کہ اس بار ہمارا کیرالہ ایل ڈی ایف اور یو ڈی ایف کے شیطانی چکر کو توڑ دے گا‘‘۔
مودی نے کہا’’مجھے پختہ یقین ہے کہ اس بار کیرالہ بی جے پی کی بھرپور حمایت کرے گا۔ مودی آپ سے وعدہ کرتے ہیں کہ وہ کیرالہ کی ترقی میں کوئی کسر نہیں چھوڑیں گے‘‘۔
وزیر اعظم نے جنوبی کیرالہ کے اس قصبے میں بی جے پی زیرقیادت این ڈی اے کے ایک بڑے اجلاس سے خطاب کرتے ہوئے تیسرے شخص میں اپنا ذکر کرتے ہوئے کہا۔
ان کا یہ بیان الیکشن کمیشن کے اس بیان کے فورا بعد سامنے آیا ہے جس میں کہا گیا تھا کہ وہ ہفتہ کو لوک سبھا انتخابات کے شیڈول کا اعلان کرے گا۔
کیرالہ میں عیسائی برادری سے رابطہ کرتے ہوئے ، جو بی جے پی کے ذریعہ ’اے‘ زمرے کے حلقوں بشمول پتھانامتھیٹا ، تھریسور اور ترواننت پورم میں این ڈی اے کی جیت کیلئے اہم ہے ، وزیر اعظم نے ویٹیکن میں پوپ فرانسس کے ساتھ اپنی ملاقات کا ذکر کیا اور یمن میں داعش کے عسکریت پسندوں کے ہاتھوں پکڑے گئے کوٹام کے ایک پادری کو بچانے کیلئے اپنی حکومت کی کامیاب کوششوں پر روشنی ڈالی۔
وزیر اعظم نے کہا کہ کیرالہ کی ترقی کیلئے مرکزی حکومت کی تمام کوششوں کے درمیان یہ بھی ضروری ہے کہ ریاست کے لوگوں کے صحیح خیالات اور آراء مرکز تک پہنچیں۔انہوں نے کہا’’اگر ہمارے یہاں بی جے پی کے ممبران پارلیمنٹ ہیں، تو لوگوں کیلئے مرکز کو اپنے خیالات سے آگاہ کرنا اور یہاں مرکزی پروجیکٹوں کو نافذ کرنا آسان ہوگا۔ کیرالہ کے لوگوں کو جن اسکیموں اور پروجیکٹوں کی ضرورت ہے، انہیں بی جے پی کے ممبران پارلیمنٹ کے ذریعے مرکز تک اور بھی بہتر طریقے سے پہنچایا جا سکتا ہے۔‘‘