سرینگر//
سعودی عرب کی سپریم کورٹ نے مملکت میں اتوار کی شام رمضان المبارک کا چاند دیکھنے کی اپیل کی ہے۔ ام القری کیلنڈر کے مطابق اتوار۱۰مارچ کو شعبان کی۲۹تاریخ ہو گی۔
سرکاری خبررساں ایجنسی ’ایس پی اے‘ کے مطابق سپریم کورٹ سے جاری بیان میں کہا گیا کہ مملکت میں جس شخص کو بھی ماہ رمضان کا چاند دکھائی دے وہ اپنی گواہی قریب ترین عدالت میں دے۔
بیان میں مزید کہا گیا کہ چاند دیکھنے کی گواہی کے لیے اگرعدالت تک جانا ممکن نہ ہو تو قریبی سینٹر سے ٹیلی فون پر چاند دیکھنے کی شہادت کے بارے میں اطلاع دے۔
واضح رہے ام القری کیلنڈر کے مطابق ۱۰مارچ۲۰۲۴ کو قمری ماہ شعبان کی ۲۹تاریخ ہو گ۔ اس حوالے سے عدالتی عالیہ نے سعودی شہریوں اور مملکت میں رہنے والے غیرملکیوں سے بھی اپیل کی ہے کہ وہ رویت ہلال کی گواہی ریکارڈ کرائیں۔
اس دوران عمومی صدارت برائے امور حرمین شریفین کی جانب سے رمضان المبارک میں پابندیوں کے بغیر مسجد حرام کو پوری صلاحیت کے ساتھ متعمرین اور نمازیوں کے لیے کھولنے کے اعلان کے بعد تقریباً۲۰ لاکھ فرزندان توحید مسجد حرام میں نماز وعمرہ ادا کریں گے۔
العربیہ نیوز کے فلیگ شپ پروگرام ’’من الحرمین‘‘ میں نمائندہ خصوصی سلطان السلمی سے گفتگو کرتے ہوئے معاون برائے مدیر عام اور انڈر سیکرٹری امور مسجد حرام ڈاکٹر سعد المحیمید بتایا کہ’’مشترکہ پلان کے تحت نمازیوں اور متعمرین کے مسجد میں داخلے کے الگ الگ راستے مقرر کیے گئے ہیں تاکہ حرمین اتھارٹی اپنی صلاحیت اور منصوبے کو بروئے کار لا کر اللہ کے گھر کا قصد کرنے والوں کو اطمینان اور سہولت کے ساتھ یہ فریضہ ادا کرنے کے قابل بنا سکے۔‘‘