’یو ٹی میں کھیلوں کا نیا دور شروع ہوا ہے‘

گلمرگ//
لیفٹیننٹ گورنر منوج سِنہا نے کہا ہے کہ جموں کشمیر میں کھیلوں کا ایک نیادور شروع ہواہے ۔کھیلوں کے بنیادی ڈھانچے میںبہتری آئی ہے جس سے کھیلوں کے شعبے کو فروغ ملاہے۔
سنہا آج عالمی شہرت یافتہ سکی ریزورٹ گلمرگ میں چوتھے کھیلو اِنڈیا گیمز کے سنو سپورٹس ایونٹ کا اِفتتاح کررہے تھے ۔
اِس موقعہ پر مرکزی وزیر مملکت اَمورِ نوجوان و کھیل کود اور اَمورِ داخلہ نسیتھ پرمانک نے بھی شرکت کی۔
سنہا کاکہنا تھا کہ وزیر اعظم نریندر مودی جی کی قیادت میں جموں و کشمیر میں کھیلوں کا ایک نیا دور شروع ہوا ہے۔ لیفٹیننٹ گورنر نے کہا کہ جدید ترین بنیادی ڈھانچے اور متعلقہ سہولیات پر نئے سرے سے زوردینے سے کھیلوں کے شعبے کو زبردست فروغ ملا ہے۔
لیفٹیننٹ گورنر نے کہا کہ ہمارے باصلاحیت کھلاڑیوں نے قومی اور بین الاقوامی کھیلوں کے مقابلوں میں اَپنی صلاحیتوں کا لوہا منوایا ہے۔ اُنہوں نے کہا کہ ان کی کامیابیاں اُبھرتے ہوئے کھلاڑیوں کو جموں وکشمیر یوٹی اورملک کا نام روشن کرنے کی ترغیب دے رہی ہیں۔
ایل جی نے مرکزی حکومت، مرکزی وزارتِ کھیل،سپورٹس اَتھارٹی آف اِنڈیا کے تعاون کے لئے ان کا شکریہ اَدا کیا۔ اُنہوں نے مزید کہا کہ پی ایم ڈی پی کے تحت جموں و کشمیر میں قومی اور بین الاقوامی سطح کے کھیلوں کے بنیادی ڈھانچے کو ترقی دی گئی ہے ۔
لیفٹیننٹ گورنر نے سرمائی کھیلوں کے مختلف شعبوں میں حصہ لینے والے ملک بھر سے کھلاڑیوں کیلئے نیک خواہشات کا اظہار کیا۔ اُنہوں نے کہا کہ یہ ۶۰۰سے زائد کھلاڑیوں کے لئے ایک اہم موقعہ ہے جو اِس شاندار ایونٹ کی تیاری کر رہے ہیں۔
سنہا نے کھلاڑیوں، ٹیم آفیشلوں اور کھیلوں کے شائقین کو دعوت دی کہ وہ جموں کشمیر کی گرمجوشی سے لطف اندوز ہوں، الپائن سکی، نارڈک سکی، برف کوہ پیمائی کے مقابلوں سے لطف اندوز ہوں اور زمین پر جنت کے ناقابل یقین نظاروں اور ضیافتوںسے بھی لطف اندوز ہوں۔
لیفٹیننٹ گورنر نے کہا ’’ چوتھے کھیلو اِنڈیا سرمائی کھیلوں میں اگلے چار دنوں میں سکی ڈھلوان پر سخت محنت، مہارت، لگن اور کھیلوں کی عمدہ کارکردگی کا اعزاز دیںگے اور مجھے یقین ہے کہ اِس سے تمام ٹیموں کے درمیان بھائی چارے، اَمن اور ہم آہنگی کے جذبے کی تجدید ہوگی۔‘‘
ایل جی نے اِفتتاحی تقریب میں جموںوکشمیر یوٹی کے شہروں اور دیہاتوں میں کھیلوں کے مضبوط کلچر کو فروغ دینے کی حکومت کی کوششوں پر روشنی ڈالی۔
مرکزی وزیر اطلاعات و نشریات اوراَمور نوجوان و کھیل کود اَنوراگ سنگھ ٹھاکر نے ایک ویڈیو پیغام کے ذریعے کھیلو اِنڈیا سرمائی کھیلوں کے کامیاب انعقاد کے لئے نیک خواہشات کا اظہار کیا اور ٹورنامنٹ میں حصہ لینے والے کھلاڑیوں کی حوصلہ افزائی کی کہ وہ ٹورنامنٹ میں اپنا بہترین مظاہرہ کریں۔
مرکزی وزیر مملکت اَمورِ نوجوان و کھیل کود اور اَمورِ داخلہ نسیتھ پرمانک نے نچلی سطح پر کھیلوں کے بنیادی ڈھانچے کو ترقی دینے اور دیگر ریاستوں کے لئے بھی ایک سنگ میل قائم کرنے کے لئے لیفٹیننٹ گورنر کی قیادت والی یوٹی اِنتظامیہ کی ستائش کی۔