پونچھ کی دو خواتین سرحد عبور کرکے پاکستانی زیر قبضہ کشمیر پہنچ گئیں

جموں//
جموں کشمیر کے پونچھ ضلع میں ایل او سی پر واقع سلوتری گاؤں کی ایک خاتون سرحد عبور کرکے فرار ہو گئی ہے جس کی تلاش شروع کی گئی ہے ۔
خاتون کے اہل خانہ نے پولیس میں گمشدگی کی رپورٹ درج کرائی ہے ۔
اطلاعات کے مطابق پونچھ کے سلوتری گاؤں کی ایک خاتون مبینہ طور پر سرحد عبور کرکے پاکستانی زیر قبضہ کشمیر پہنچ گئی ہے ۔
اہل خانہ کے مطابق ۲۴سالہ شبنم دو بیٹیوں کی ماں ہے اور وہ پاکستانی زیر قبضہ علاقے بانڈی عباس پور پہنچ گئی ہے ۔انہوں نے مزید بتایا کہ شبنم نے ایک اور خاتون کے ہمراہ بارڈر کراس کیا ہے ۔اہل خانہ نے ہندو پاک حکومتوں سے خاتون کو واپس گھر بھیجنے کی خاطر مدد مانگی ہے ۔
ان کا کہنا تھا کہ جب سے شبنم سرحد عبور کر گئی تب سے ان کی دو بچیاں رو رہی ہیں۔
اہل خانہ نے بتایا کہ پورا خاندان پریشان ہے اور مرکزی وزار ت خارجہ کو اس حوالے سے فوری طورپر اقدامات اٹھانے چاہئے ۔
ذرائع کا کہنا ہے کہ پونچھ کے کرماڑا سیکٹر سے خاتون سرحد عبور کرکے پاکستانی زیر قبضہ کشمیر پہنچ گئی ہے ۔
دریں اثنا پولیس ذرائع نے اس حوالے سے کچھ بھی کہنے سے انکار کیا ۔