شبانہ آگ کی وارداتوں میں دو رہائشی مکانوں کو نقصان

سرینگر//
جموں وکشمیر کی گرمائی راجدھانی سرینگر میں شبانہ آگ کی وارداتوں میں دو رہائشی مکانوں کو نقصان پہنچا ہے ۔
اطلاعات کے مطابق زالڈگر سرینگر میں اس وقت سنسنی کا ماحول پھیل گیا جب رہائشی مکان سے آگ نمودار ہوئی جس نے آناًفاناً پورے مکان کولپیٹ میں لے لیا۔
فائر اینڈایمرجنسی عملے اور مقامی لوگوں کی بروقت کارروائی کے نتیجے میں گر چہ آگ پر قابو پایا گیا تاہم آتشزدگی کی اس واردات میں رہائشی مکان کو نقصان پہنچا ہے ۔
دریں اثنا اشبر نشاط میں بھی آگ کی ایک واردات میں عمارت کو جزوی طورپر نقصان پہنچا ہے ۔
پولیس نے آگ لگنے کی وجوہات جاننے کی خاطر کیس درج کرکے تحقیقات شروع کی ہے ۔
اس دوران جموںکشمیر کے ضلع رام بن کے بانہال علاقے کے سبزی اور پھل مارکیٹ میں آگ کی ایک واردات میں درجنوں شیڈ نما دکانات خاکستر ہوگئے ۔
ذرائع نے بتایا کہ رام بن کے بانہال علاقے میں ایک سبزی اور پھل مارکیٹ میں لکڑی اور ٹین سے بنے ایک دکان میں آگ لگ گئی جس کے شعلوں نے باقی دکانوں کو بھی اپنی لپیٹ میں لے لیا۔
ذرائع نے کہا کہ گرچہ پولیس، فوج، فائر ٹنڈرس اور مقامی لوگوں نے مشترکہ طور پر کارروائیاں انجام دے کر آگ کو قابو میں کر لیا تاہم درجنوں شیڈوں کا خاکستر ہونے سے نہ بچا سکے ۔
ان کا کہنا تھا کہ ان شیڈ نما دکانوں میں موجود سارا مال و اسباب خاکستر ہوگیا۔تاہم آگ کی اس واردات میں کسی قسم کے جانی نقصان کی کوئی اطلاع نہیں ہے ۔
حکام کا کہنا ہے کہ آگ لگنے کی وجوہات معلوم کی جا رہی ہیں۔
دریں اثنا پولیس نے اس سلسلے میں کیس درج کرکے کارروائیاں شروع کی ہیں۔