کشمیر کا بیرون دنیا کے ساتھ ایک روز بعد ہوائی رابطہ بحال

سرینگر//
وادی کشمیر کا بیرون دنیا کے ساتھ ہوائی رابطہ ایک روز بعد پیر کو بحال ہوگیا۔
بتادیں کہ برف باری کے پیش نظر متعلقہ حکام نے اتوار کے روز سری نگر بین الاقوامی ہوائی اڈے پر تمام پروازوں کو منسوخ کیا تھا۔
متعلقہ حکام نے بتایا کہ رن وے سے برف ہٹایا گیا ہے اور موسم صاف ہونے کے ساتھ ہی ہوائی ٹریفک کو بحال کیا گیا ہے ۔انہوں نے کہا کہ صبح کے وقت پروازوں میں قدرے تاخیر ہوئی لیکن بعد ازاں ہوائی ٹریفک معمول کے مطابق رہا۔
اس دوران وادی کشمیر کو ملک کے باقی حصوں کے ساتھ جوڑنے والی سرینگر،جموں قومی شاہراہ مرمتی کام کے پیش نظرمنگل کے روز ٹریفک کی نقل و حمل کیلئے بند رہے گی۔
جموںکشمیر ٹریفک پولیس نے بتایا کہ سرینگر ، جموں قومی شاہراہ پرمنگل کے روز ٹریفک کی نقل و حمل معطل رہے گی۔
پولیس نے کہا کہ قومی شاہراہ پر صبح کے۸بجے سے کسی بھی گاڑی کو قاضی گنڈ سے جموں جانے کی اجازت نہیں ہوگی۔
حکام کے مطابق سری نگر جموں شاہراہ پر ڈلواس کے نزدیک مرمت کے پیش نظر شاہراہ منگل صبح آٹھ بجے سے لے کر بدھ کی صبح آٹھ بجے تک دو طرفہ ٹریفک کیلئے بند رہے گی اور اس دوران کسی بھی گاڑیوں کو جموں سے سرینگر اور سری نگر سے جموں کی طرف جانے کی اجازت نہیں دی جائے گی۔
ادھر جنوبی کشمیر کے ضلع شوپیاں کو صوبہ جموں کے پونچھ اور راجوری اضلاع کے ساتھ جوڑنے والا تاریخی مغل روڈ اور سرینگر لیہہ شاہراہ پر ٹریفک کی نقل و حمل مسلسل بند ہے جبکہ بھدروا‘ چمبہ اور کشتواڑ ، سنتھن،اننت ناگ سڑکیں بھی ہنوز بند ہیں۔