ٹھیلے والے صرف مخصوص جگہوں پر ہی اپنا کاروبار جاری رکھ سکتے ہیں:ایس ایم سی

سرینگر//
سرینگر میونسپل کارپوریشن گرمائی راجدھانی سرینگر کے مختلف علاقوں میں غیر قانونی طور پر شاہراہوں پر قبضہ کرنے والوں کے خلاف اپنی کارروائیاں شد و مد سے جاری رکھے ہوئے ہے ۔
اسی سلسلے کی ایک کڑی کے طور پر جمعرات کو سرینگر کے گونی کھن علاقے سے لے کر لل دید ہسپتال تک ٹھیلے والوں کے خلاف کارروائیاں عمل میں لائی گئیں۔
ایس ایم سی کمشنر اطہر عامر خان کے مطابق ٹھیلے لگانے والوں کیلئے مخصوص جگہ کی نشاندہی گئی ہے جہاں پر وہ اپنا کاروبار جاری رکھ سکتے ہیں۔انہوں نے بتایا کہ سڑکوں پر ناجائز قبضہ کرنے والوں کے خلاف قانون کے مطابق کارروائی عمل میں لائی جائے گی۔
سری نگر میونسپل کارپوریشن نے جمعرات کے روز گونی کھن سے لے کر لل دید ہسپتال تک شاہراہوں کے اردگرد ٹھیلے لگانے والوں کے خلاف کارروائی عمل میں لائی اور اُن کا مال بھی ضبط کیا۔
ٹھیلے والوںکو متنبہ کیا گیا کہ خلاف ورزی کرنے والوں کے خلاف قانون کے مطابق کارروائی عمل میں لائی جائے گی۔
اس موقع پر نامہ نگاروں سے بات چیت کے دوران میونسپل کمشنر نے بتایا ’’ہم نے تین مقامات کی نشاندہی کی ہے جہاں پر چھاپڑی فروش اپنا کاروبار جاری رکھ سکتے ہیں۔ ہری سنگھ ہائی اسٹریٹ میں خالصہ زون کے پاس جگہ چھاپڑی فروشوں کے لئے مخصوص رکھی گئی ہے ‘‘۔
اطہر کے مطابق لل دید ہسپتال کے ارد گرد ٹھیلے لگانے والوں کیلئے بھی جگہ کی نشاندہی کی گئی ہے جو دو چار دنوں کے دوران تیار ہوگا۔
کمشنر موصوف نے بتایا کہ بٹہ مالو میں بھی ایک جگہ کا انتخاب کیا گیا ہے جہاں پرچھاپڑی فروش لگانے والے اپنا کاروبار شروع کرسکتے ہیں۔
یہ سوال پوچھنے جانے پر کہ مہاراجہ بازار میں قائم دکاندار شاہراہوں پر مال رکھ کر قانون کی دھجیاں اُڑا رہے ہیں کے جواب میں ایس ایم سی کمشنر نے بتایا کہ اُنہیں متنبہ کیا گیا ہے کہ آگے سے وہ ایسا کرنے سے گریز کریں بصورت دیگر اُن کے خلاف بھی سخت کارروائی عمل میں لائی جائے گی۔
اطہر نے بتایا کہ سڑکیں لوگوں کے چلنے پھرنے کیلئے مخصوص ہوتی ہیں لہذا ان پر قبضہ کرنے کی کسی کو اجازت نہیں دی جائے گی۔
ان کا کہنا تھا کہ سری نگر میونسپل کارپوریشن نے ٹھیلے لگانے والوں کے لئے مختلف مقامات پر جگہ کی نشاندہی کی ہے لہذا وہ وہیں پر اپنی ریڑھیاں لگا سکتے ہیں باقی کسی بھی جگہ اُنہیں ایسا کرنے کی اجازت نہیں دی جائے گی۔