۲۰۲۴ کو انتخابات اورجمہوریت کا سال قرار دیا جارہا ہے اور… اور اس لئے قرار دیا جا رہا ہے کہ دنیا بھر میں زائد از ۵۰ ممالک میں امسال انتخابات ہونے والے ہیں… بھارت اور پاکستان میں بھی ۔جی ہاں دونوں ہمسایہ ممالک میں الیکشن ہونے والے ہیں اور… اور ووٹ پڑنے … ایک بھی ووٹ پڑنے سے پہلے ہی یہ واضح ہے کہ پاکستان میں کون جیت رہا ہے یا وہاں کسے جتوایا جارہا ہے اور بھارت میں دہلی کے تخت پر کون براجمان ہو رہا ہے… یہ کوئی راکٹ سائنس نہیں ہے اور بالکل بھی نہیں ہے کہ دہلی کے شاہی تخت پر کون تشریف رکھے گا… یہ واضح ہے کہ مودی جی ہی مسلسل تیسری بار بھی وزیر اعظم بن جائیں گے اور… اور اس کی گارنٹی ہے… مودی گارنٹی اور بھارت کے واسیوں کی بھی ۔ پاکستان میں میاں صاحب چوتھی بار وزیر اعظم بننے کے خواب دیکھ رہے ہیں اور… اور ممکن ہے کہ وہ وزیر اعظم بن بھی جائیں گے …اورایک بار پھر اسلام آباد میں میاں صاحب اور دہلی میں مودی جی کی سرکاری ہو گی… لیکن… لیکن صاحب دہلی دہلی ہے اور اسلام آباد ‘ اسلام آباد … دہلی کے شاہی تخت پر بیٹھنے والے کو لوگ اپنے کندھوں پر بٹھا کر اس تخت تک لے جاتے ہیں… کسی اور کا اس میں کوئی عمل دخل نہیں ہو تا ہے اور… اور بالکل بھی نہیں ہو تا ہے… لیکن… لیکن اُس پار صورتحال بالکل مختلف ہے۔اُس پار ایک طاقت ور ادارہ اپنا’لاڈلے‘ کو منتخب کرتا ہے اور… اور جس کرسی پر اسے بٹھا تا ہے‘ پھراسی کرسی کی ٹانگ بھی کھینچ لیتا ہے… بقول بلاول بٹھو میاں صاحب جن کی مدد سے وزیر اعظم بننے جا رہے ہیں‘ کل وہ ان کیخلاف ہی رخ کریں گے… تین بار تو ایسا ہی ہوا اور… اور میاں صاحب نے ایک بار بھی اپنی معیاد مکمل نہیں کی… لیکن کیا چوتھی بار بھی ان کے ساتھ ایسا ہی ہونے والا ہے… یا جناب چوتھی بار بھی خود کے ساتھ ایسا کریں گے یا کرنے دیں گے… اس کیلئے تھوڑا انتظار کرنا پڑے گا … آپ کو بھی اور ہمیں بھی کہ… کہ پہلے میاں صاحب کو الیکشن تو جیتنے دیجئے اور… اور وہ یقینا جیت جائیں گے کہ… کہ کرکٹ میں میچ فکسنگ کی تاریخ زیادہ پرانی نہیں ہے اور… اور بالکل بھی نہیں ہے… لیکن… لیکن پاکستان کے الیکشن اور میچ فکسنگ کا آپس میں اتنا ہی گہرا اور پرانا تعلق ہے جتنی اس ملک کی تاریخ ہے ۔ ہے نا؟