کراچی: پاکستان کے خلاف بقیہ ٹی20 میچز کے لیے نیوزی لینڈ ٹیم کے کپتان کین ولیمسن ہیمسٹرنگ انجری کے باعث سیریز سے باہر ہوگئے۔
سیریز کے دوسرے ٹی20 میں کین ولیمسن 15 گیندوں پر 26 رنز بنا کر انجری کے باعث ریٹائرڈ ہٹ ہوگئے تھے جبکہ انکے بعد ٹیم کی قیادت ٹم ساؤتھی نے کی تھی۔
کین ولیمسن کی جگہ ٹم سیفرٹ کو ٹیم میں شامل کیے جانے کا امکان ہے جوکہ ممکنہ طور پر ڈیون کانوے کی جگہ وکٹ کیپنگ بھی کریں گے۔ کیوی کوچ کا کہنا ہے کہ پہلے بھی کین ولیمسن کا یہی گھٹنا زخمی ہوا تھا۔
نیوزی لینڈ نے پاکستان کو میچ میں 21 رنز سے شکست دی تھی۔ دونوں ٹیموں کے درمیان تیسرا ٹی20 ڈونیڈن میں کھیلا جائے گا، کیوی ٹیم تیسرا میچ جیت کر سیریز جیت جائے گی۔
پاکستان کے خلاف دوسرے ٹی 20 میں نیوزی لینڈ کے کپتان کین ولیمسن ہیمسٹرنگ انجری کا شکار ہوگئے، جس کی وجہ سے انھیں 26 کے انفرادی اسکور پر ریٹائرڈ ہرٹ ہونا پڑا۔
دسویں اوور میں سنگل لینے کے دوران وہ اس تکلیف کا شکار ہوئے، اوور کے اختتام پر فزیو نے ان کا معائنہ کیا مگر وہ بیٹنگ جاری رکھنے کے قابل نہیں ہوئے، جس پر انھیں میدان سے باہر جانا پڑا۔
انھوں نے وکٹ پر مختصر قیام کے دوران 15 بالز کا سامنا کرتے ہوئے 3 چوکے اور ایک چھکا جڑا، ان کی عدم موجودگی میں ٹم ساؤتھی نے باقی میچ میں ٹیم کی قیادت کی۔
گزشتہ برس سے ہی ولیمسن فٹنس مسائل کا شکار ہیں، پاکستان کے خلاف جاری سیریز کے تیسرے میچ میں انھیں پہلے ہی آرام دینے کا فیصلہ کیا گیا تھا۔